Ministri i Mbrojtjes, Ermal Nufi, ka reaguar për herë të parë ndaj akuzave të ngritura nga ish-zëvendëskryeministri Arben Ahmetaj për një trafik të dyshuar ndërkombëtar armësh, si dhe ndaj audiopërgjimit të publikuar prej tij në “Syri TV”.
Nufi u pyet këtë të mërkurë nga gazetarja Ambrozia Meta, teksa po hynte në një takim të kryeministrit Edi Rama me qeverinë dhe drejtuesit politikë të Partisë Socialiste.
Përballë pyetjes për akuzat dhe audiopërgjimin, ministri i Mbrojtjes i mohoi pretendimet për trafik armësh.
“Çfarë trafiku armësh? A jeni në terezi? Nuk ka…”, u përgjigj Nufi.
Gazetarja e pyeti më tej nëse kishte dëgjuar audiopërgjimin e publikuar nga Ahmetaj.
“Përgjimet e dynjasë do dëgjoj unë?”, tha ministri.
Ndërsa kur u pyet nëse do të jepte një sqarim publik për akuzat, Nufi u përgjigj shkurt: “Asgjë”.
Reagimi i ministrit vjen dy ditë pasi Arben Ahmetaj publikoi audiopërgjime ku, sipas tij, flitet për tregti dhe trafik ndërkombëtar armësh dhe ngriti akuza ndaj disa personave, mes tyre edhe Ermal Nufit.
Ahmetaj ka pretenduar se në materialet audio flitet për blerje armësh në vende të huaja dhe më pas për transportimin e tyre drejt zonave të konfliktit. Ai ka lidhur këto pretendime me biznesmenin Ron Yefet, kompaninë “Timak Defense” dhe KAYO. Këto janë pretendime të bëra publikisht nga Ahmetaj dhe mbeten për t’u verifikuar nga institucionet.
Çfarë ka thënë Nufi më herët për industrinë ushtarake?
Në një interpelancë në Kuvend më 23 prill 2026, ministri i Mbrojtjes, Ermal Nufi, foli për zhvillimin e industrisë ushtarake në Shqipëri dhe rolin e kompanisë shtetërore KAYO.
Gjatë debatit parlamentar, Nufi përmendi edhe kompaninë Advanced Arms Technology (AAT), duke deklaruar se ajo prodhon armë dhe se këto produkte janë aktualisht në përdorim në zona konflikti.
“Së fundmi kemi dhe shoqërinë AAT, Advanced Arms Technology, e cila prodhon armë dhe këto armë, siç e thashë edhe njëherë, janë sot në përdorim në konflikte diku, jo patenta fiktive”, deklaroi Nufi në Kuvend.
Ministri shpjegoi gjithashtu se KAYO është konceptuar si një strukturë që koordinon dhe zhvillon industrinë ushtarake, duke krijuar partneritete me kompani të tjera për prodhimin e produkteve ushtarake në Shqipëri.
Sipas Nufit, modeli synon që përmes bashkëpunimit me kapitalin privat të krijohen kapacitete për prodhimin e produkteve ushtarake, si për nevojat e Forcave të Armatosura, ashtu edhe për eksport.
Në këtë kuadër, ministri ka folur për rikthimin e industrisë ushtarake shqiptare dhe për prodhimin e produkteve të ndryshme, përfshirë armë, municione dhe dronë.
Deklarata e Nufit në Kuvend është rikthyer në vëmendje pas akuzave të ish-zëvendëskryeministrit Arben Ahmetaj, i cili në ditët e fundit ka pretenduar se ekziston një skemë e trafikut ndërkombëtar të armëve dhe ka kërkuar që organet e drejtësisë të verifikojnë edhe deklarimet e ministrit.
Ahmetaj ka ngritur pikëpyetje se ku prodhohen armët, kush i prodhon, ku dërgohen dhe nëse bëhet fjalë për armë shqiptare apo për marrëveshje të tjera ndërkombëtare. Këto janë pretendime të Ahmetajt dhe nuk përbëjnë, në këtë fazë, konstatime të organeve të drejtësisë.
