Analisti Ergys Mërtiri ka komentuar reagimin e kryetarit të Partisë Demokratike, Sali Berisha, lidhur me pritshmëritë e tij nga një vendim i mundshëm i administratës së Donald Trump kundër George Soros, që sipas Berishës mund të ndikojë edhe në statusin e tij “non grata”.

I ftuar në emisionin “Tirana Live”, Mërtiri e cilësoi këtë si një përpjekje të ish-kryeministrit për të mbajtur nën kontroll partinë dhe militantët, duke i ushqyer me iluzione.

“Çfarë thotë sot, nuk thotë nesër. Berisha jeton me ëndrra. Kërkon të shesë miqësinë imagjinare me Trump. Përpjekja që ka bërë Berisha është që të mbajë militantët dhe partinë me shpresa të rreme. Po lufton për të mbijetuar, sepse është një hap larg ndaj pensionimit të tij politik”, u shpreh analisti.

Sipas tij, skena politike shqiptare është dëmtuar rëndë nga mungesa e rivalitetit real, duke i dhënë kryeministrit Edi Rama avantazhin e vazhdueshëm në zgjedhje.

“Politika është vrarë, sepse nuk ka rivalitet. Berisha nuk ka asnjë shans të vijë në pushtet. Nëse ai pranon zgjedhjet, pranon edhe humbjen dhe duhet të zbatojë statutin e partisë – që në rast humbjeje, kryetari duhet të largohet dhe nuk ka të drejtën e rikandidimit”, shtoi ai.

Mërtiri foli gjithashtu për gjendjen e brendshme në PD, ku sipas tij sundon një klimë represive ndaj çdo kritike.

“Përjashtohet nga partia kush kërkon largimin e Sali Berishës”, theksoi analisti, duke nënvizuar se mungesa e debatit të brendshëm po e dëmton më tej opozitën shqiptare.