Ish-kryeministri Sali Berisha ka reaguar ashpër pas arrestimeve dhe hetimeve që lidhen me kompaninë Bankers Petroleum, duke akuzuar Prokurorinë se po deformon të vërtetën dhe po sulmon padrejtësisht një kompani që, sipas tij, ka kontribuar në mënyrë të madhe gjatë periudhës kur ai dhe qeveria e tij ishin në pushtet.

“Kontrata me Bankers Petroleum është firmosur para qeverisë sonë, por ne kemi bërë më të jashtëzakonshmen duke vendosur rentën 10 përqind, që është disa herë më shumë se tatimi mbi fitimin,” deklaroi Berisha. Ai shtoi se kompania ka paguar “qindra miliona euro” në vit gjatë periudhës 2006–2013, duke përfshirë edhe taksën e karbonit dhe taksën e holluesit, të cilat sipas tij janë paguar disa herë pa arsyetim.

Berisha theksoi gjithashtu se Bankers ka paguar mbi 60–70% të rentës së gjithë industrisë nxjerrëse në Shqipëri dhe ka mbajtur mbi 1,500 familje me paga dhe sigurime shoqërore gjatë qeverisjes së tij.

“Nuk mund të pranoj që Prokuroria të bëjë deklarata mashtruese dhe të përdorë mediat si shpatë gjobëvënëse,” tha Berisha, duke bërë thirrje për investigim të thelluar dhe verifikim në librat e tatimeve.

Ai nuk dha detaje për periudhën pas vitit 2013, duke shprehur dyshime se mund të jenë bërë keqmenaxhime, por tha se “është e vështirë të besohet se disa ministra nuk kanë lejuar pagesa fare”.