Kolegji Zgjedhor rrëzoi pasditen e së enjtes ankimin e PD-ASHM lidhur me rezultatin përfundimtar të zgjedhjeve të 11 majit, duke konfirmuar vendimin e Komisionit Qendror të Zgjedhjeve.
Vendimi u mor me shumicë votash dhe pas tij hapet rruga që Presidenti Bajram Begaj të nxjerrë dekretin për mbledhjen e Parlamentit në legjislaturën e re.
Shqyrtimi i ankimit nisi mëngjesin e së enjtes nga trupa prej pesë anëtarësh e Kolegjit Zgjedhor, me Lutfije Celamin relatore. Gjatë seancës, PD-ASHM kërkoi rrëzimin e vendimit, duke risjellë pretendimet për parregullsi dhe problematika gjatë procesit zgjedhor.
Përfaqësuesit e Partisë Socialiste dhe të KQZ-së kërkuan lënien në fuqi të vendimit të Komisionit, për të mundësuar që Presidenti të dekretojë datën e mbledhjes së Parlamentit të ri, duke siguruar vijimësinë e procesit demokratik.
