Microsoft vazhdon t’i shtyjë njerëzit të zgjedhin kompjuterin Copilot+.

Këtë herë, është një postim në blogun zyrtar me titull “Kompjuterët Copilot+ janë kompjuterët më të fuqishëm me Windows të prodhuar ndonjëherë. Tani ata kanë më shumë veçori të inteligjencës artificiale për t’ju ndihmuar çdo ditë”.

Ky njoftim është, në thelb, një “letër dashurie” e gjatë nga vetë kompania rreth arsyes pse përdoruesit e Windows 10 duhet të blejnë një kompjuter Copilot+, transmeton Telegrafi.

Nëse kjo nuk ju bind, postimi përfundon me një përmendje të drejtpërdrejtë të njerëzve që përdorin sisteme operative më të vjetra, duke i bindur ata se kompjuterët Copilot+ ofrojnë “vlerë të jashtëzakonshme” dhe se tani është “koha më e zgjuar për të blerë një kompjuter të ri”.

Kompania po u tregon gjithashtu përdoruesve të Windows 10 dritare të mëdha pop-up me ekran të plotë, për t’i bindur ata të blejnë një kompjuter me Windows 11.

Pretendohet se përdoruesit mund të “përmirësojnë blerjen e tyre” duke zgjedhur një kompjuter Copilot+, në vend të një kompjuteri të rregullt.

Në muajt e mëparshëm, Microsoft i ka bezdisur përdoruesit e Windows 10 që të përditësojnë në Windows 11, por nuk është përqendruar shumë në këndvështrimin Copilot+.

Tani janë pak më agresivë, sepse siç thonë ata, “vetëm” 20 milionë njerëz përdorin Copilot çdo javë, që është shumë larg 400 milionëve që ka ChatGPT.