Nga e shtuna, kalimi në aksin Thumanë-Kashar do të jetë me pagesë, duke nisur me një tarifë prej 270 lekësh për mjetet e vogla.

Çmimi, i cili përfshin 2.52 euro me TVSH për automjetet e lehta, rritet në varësi të kategorisë së mjeteve, por përdoruesit denoncojnë abuzime me kursin e këmbimit nga kompania koncesionare “Gener 2”.

Kjo tarifë do të përllogaritet çdo vit, dhe kompania private do mund ta rrisë atë në varësi të luhatjeve të kursit të këmbimit lekë euro. Por do të ketë edhe rrugë alternative, ku kalimi do të jetë pa pagesë për qytetarët.

Segmenti Thumanë-Kashar u hap për qarkullimin e automjeteve në datën 30 qershor të këtij viti. Ka një gjatësi prej 21 kilometrash dhe është autostrada e parë e Kategorisë A. që nënkupton jo vetëm standarte europiane të ndërtimit të rrugës, por edhe një limit shpejtësie tjetër nga ai që kanë akset e tjera rrugore të vendit. Ky aks rrugor është aksi i parë ku qarkullohet me një limit shpejtësie deri në 130 kilometra në orë.