Policia norvegjeze ka kontrolluar sot shtëpitë e ish-kryeministrit dhe ish-sekretarit të përgjithshëm të Këshillit të Evropës, Thorbjørn Jagland, në kuadër të një hetimi të vazhdueshëm lidhur me pretendimet për korrupsion dhe lidhjet e tij me financierin e ndjerë amerikan Jeffrey Epstein.
Lajmi u konfirmua nga avokati i Jagland dhe nga njësia norvegjeze kundër krimit ekonomik dhe korrupsionit, Okokrim. Imazhet e publikuara nga mediat norvegjeze VG, Dagbladet, Dagens Næringsliv dhe Aftenposten tregojnë hetues që largohen nga rezidenca e Jagland në Oslo me kuti dokumentesh.
Bastisja erdhi një ditë pasi Këshilli i Evropës – institucioni kryesor për të drejtat e njeriut në kontinent, të cilin Jagland e drejtoi nga viti 2009 deri në 2019 – i hoqi atij imunitetin diplomatik.
Sipas avokatit të tij, Anders Brosveet, kontrolli ishte “i pritshëm” dhe përbën një procedurë standarde në hetime të kësaj natyre. Ai konfirmoi se Jagland tani është nën hetim për korrupsion, sipas dispozitave të kodit penal norvegjez që i lejojnë një të dyshuari të ketë përfaqësim ligjor dhe i hapin rrugë veprimeve të mëtejshme hetimore.
Në sistemin juridik norvegjez, ngritja formale e akuzave ndodh zakonisht në një fazë të mëvonshme të procesit, shpesh pak javë para nisjes së gjyqit.
“Kjo nuk përfaqëson ndonjë ndryshim thelbësor në çështje, por është një pasojë ligjore e metodave hetimore të përdorura nga policia”, deklaroi Brosveet.
Vetë Jagland u shpreh për Aftenposten se është “i kënaqur që çështja po sqarohet”.
Okokrim njoftoi se përveç rezidencës në Oslo, janë kontrolluar edhe një pronë në bregdetin jugor të Norvegjisë dhe një tjetër në qarkun malor të Telemarkut. Shefi i Okokrim, Paal Loenseth, tha për Reuters se Jagland do të merret në pyetje në vijim të hetimeve.
Rasti ka marrë vëmendje të veçantë edhe për shkak të raportimeve se në vitin 2012 Jagland i kishte dërguar një e-mail Jeffrey Epstein-it, ku përmendte një vizitë në Tiranë dhe shkruante: “Isha në Tiranë, ka vajza të jashtëzakonshme”. Autoritetet nuk kanë bërë publike detaje të mëtejshme mbi kontekstin e komunikimeve.
Hetimet vijojnë, ndërsa çështja pritet të ketë jehonë të gjerë politike dhe mediatike në Norvegji dhe më gjerë.
