Pas deklaratave të ish-kryeministrit Sali Berisha, i cili pretendoi se Tom Doshi ishte arratisur dhe akuzoi institucionet për shpifje, vetë Tom Doshi ka dalë publikisht për të mohuar çdo pretendim dhe për t’i përgjigjur ashpër Berishës.
Në një reagim në rrjete sociale, Doshi shkruan:
“O Sali mashtruesi! Për 20 vjet ke shpif kundër meje. Nuk jam largu, jam këtu, në mes të Tiranës duke e pi kafen mes miqsh e jo mes paranojash. Nuk frikësohem se nuk e kam vjedhur popullin si ti!”
Doshi theksoi se lajmet për një mandat arresti dhe arratisje janë të rreme dhe se ai ndodhet në Tiranë në mënyrë të qetë, duke u takuar me miqtë e tij. Ai i bëri thirrje publikut të mos u besojë lajmeve të përhapura pa verifikim.
Deklarata vjen në një ditë ku media raportoi lajme të kundërta, pas të cilave Berisha e quajti SPAK-un “qendra kombëtare e shpifjeve dhe dezinformimit”, duke i bërë thirrje qytetarëve të mos besojnë raportimet mbi Tom Doshin.
Aktualisht, asnjë institucion zyrtar nuk ka konfirmuar ndonjë mandat arresti apo arratisje, ndërsa Tom Doshi mbetet në kryeqytet duke mohuar çdo pretendim të rremë.
