Biznesmeni i njohur nga Kosova, Behgjet Pacolli, foli për mediat në një prononcim të shkurtër pas daljes nga Prokuroria e Tiranës, ku qëndroi për më shumë se tre orë.

Pacolli u shpreh se e ka lënë çështjen “në dorë të drejtësisë”, duke theksuar se beson te vendimet gjyqësore dhe se do të veprojë sipas tyre në vijim.

“Aeroporti i Vlorës do të bëhet dhe ndoshta do të jetë më i bukuri”, deklaroi Pacolli për gazetarët, duke nënvizuar rëndësinë e projektit për zhvillimin ekonomik dhe turistik të jugut të Shqipërisë.

Pacolli u thirr nga Prokuroria për të dhënë shpjegime lidhur me një çështje hetimore që lidhet me ndërtimin e aeroportit të Vlorës. Hetimi ka të bëjë me procedurat koncesionare dhe marrëveshjet midis Pacollit dhe ortakëve të tij.

Në javët e fundit, biznesmeni ka qenë në qendër të vëmendjes për shkak të mosmarrëveshjeve me ortakët, të cilët janë pjesë e koncesionarit që po zhvillon projektin strategjik. Burime pranë hetimeve raportojnë se kjo çështje po shqyrtohet me detaje nga organet ligjzbatuese, ndërsa nuk përjashtohet mundësia e masave të mëtejshme ligjore ndaj individëve ose shoqërive të përfshira në projekt.

Pacolli nënvizoi gjithashtu se çdo vendim i marrë do të zbatohet sipas ligjit dhe se ai vetë do të bashkëpunojë me institucionet shqiptare për të përmbyllur projektin e aeroportit. Projekti i Aeroportit të Vlorës konsiderohet një investim kyç për turizmin, zhvillimin ekonomik dhe hapjen e tregjeve ndërkombëtare në jug të Shqipërisë.