Bashkimi Evropian në raportin e progresit për Shqipërinë 2025 thekson përmirësime në transparencën e prokurimeve dhe përdorimin e procedurave të hapura, por nënvizon se kuadri ligjor për koncesionet dhe partneritetet publike-private (PPP) mbetet pjesërisht i papërputhur me standardet e BE-së.
Dispozita kalimtare që i lejon institucioneve qendrore të negociojnë marrëveshje strategjike pa konkurrencë hapur ngre shqetësime për përputhshmërinë me Marrëveshjen e Stabilizim-Asociimit. Ligji për PPP-të ende nuk është rishikuar thelbësisht për të përmbushur kriteret e BE-së.
Në vitin 2024, përdorimi i prokurimeve me negociim pa publikim paraprak u ul në 2.3% të procedurave, ndërsa kontratat kornizë u rritën ndjeshëm në numër dhe vlerë, falë Organizatës Qendrore të Prokurimeve. Përdorimi i kriterit “oferta ekonomikisht më e favorshme” (MEAT) u rrit në 4.8% të tenderëve.
Megjithatë, përdorimi i PPP-ve dhe koncesioneve mbetet minimal — u hap vetëm një procedurë, pa kontrata të reja. Shqipëria duhet të forcojë kapacitetet për menaxhim efektiv dhe të përmirësojë sistemin elektronik të prokurimeve.
Në lidhje me ankimet, Komisioni i Ankesave të Shtetit trajtoi 1 151 ankesa në 2024, ndërsa Komisioni i Prokurimit Publik mori 1 050 vendime, nga të cilat 42 u apeluan në gjykatë. Raporti nënvizon nevojën për forcimin e sistemit të ankimimit dhe rritjen e konkurrencës dhe profesionalizmit në prokurimet publike.
