Gjykata Kushtetuese ka reaguar lidhur me debatet publike për pagat e magjistratëve, duke rikujtuar se për këtë çështje është shprehur më herët përmes vendimit nr. 15, datë 17 shkurt 2026.
Në një sqarim zyrtar, Gjykata thekson se përmes këtij vendimi ka përcaktuar standardin kushtetues që duhet të zbatohet nga autoritetet përgjegjëse, si dhe detyrimet që burojnë nga vendimi.
Kushtetuesja nënvizon se vendimi duhet të lexohet dhe të zbatohet në tërësi. Sipas saj, si arsyetimi, ashtu edhe dispozitivi i vendimit përbëjnë qëndrimin zyrtar të Gjykatës dhe nuk mund të interpretohen të shkëputura nga njëra-tjetra.
“Arsyetimi dhe dispozitivi i vendimit përbëjnë qëndrimin zyrtar të Gjykatës për çështjen e shqyrtuar”, thekson Gjykata, duke shtuar se ato duhet të zbatohen në përputhje me parimet kushtetuese të përcaktuara në vendim.
Në reagimin e saj, Kushtetuesja rikujton gjithashtu se vendimet e saj janë përfundimtare dhe të detyrueshme për zbatim. Respektimi i tyre, sipas Gjykatës, është një kërkesë e drejtpërdrejtë e rendit kushtetues dhe lidhet me parimin e shtetit të së drejtës dhe sigurisë juridike.
Një pjesë e rëndësishme e sqarimit lidhet edhe me mënyrën e përllogaritjes dhe ekzekutimit të pagave brenda vetë Gjykatës Kushtetuese.
Gjykata sqaron se mënyra se si administrohen pagat në institucionin e saj, në varësi të fondeve buxhetore në dispozicion, nuk mund të merret si bazë për të përcaktuar efektet juridike të vendimit nr. 15, datë 17 shkurt 2026.
Pra, sipas Kushtetueses, mënyra e administrimit të pagave të saj nuk përcakton dhe nuk ndryshon detyrimet që burojnë nga vendimi për autoritetet përgjegjëse për zbatimin e tij.
Reagimi i Gjykatës vjen në një moment kur çështja e pagave të magjistratëve është bërë pjesë e një debati publik dhe institucional, ndërsa mënyra e zbatimit të vendimit të saj ka sjellë diskutime mbi detyrimet që kanë institucionet përkatëse.
Me këtë sqarim, Gjykata Kushtetuese rikthen në vëmendje se vendimi i saj duhet të merret në konsideratë në tërësi dhe se detyrimet që burojnë prej tij nuk mund të relativizohen nga mënyra e administrimit të brendshëm të pagave në vetë Gjykatën.
Kushtetuesja thekson se respektimi i vendimeve të saj është detyrim kushtetues dhe pjesë e drejtpërdrejtë e funksionimit të shtetit të së drejtës.
