Ka hyrë në fuqi udhëzimi i përbashkët i Ministrisë së Ekonomisë, Kulturës dhe Inovacionit dhe Ministrisë së Financave, i cili përcakton tarifat për aplikimet, shërbimet arkeologjike dhe pajisjen me dokumentacion nga Arkivi Teknik i Institutit Kombëtar të Trashëgimisë Kulturore (IKTK). Udhëzimi është botuar në Fletoren Zyrtare dhe synon të formalizojë pagesat për shërbimet që IKTK ofron për publikun, kompanitë dhe institucionet.
Sipas këtij udhëzimi, aplikimi për leje ndërhyrjeje në pasuri kulturore materiale do të kushtojë 10,000 lekë, pavarësisht nga lloji i objektit apo zona ku ndodhet. Tarifa për zhvillime transformuese në territor është 100 lekë për m², ndërsa mbikëqyrja arkeologjike në terren ka tarifë 20,000 lekë/ditë. Për gërmime dhe sondazhe arkeologjike, tarifa arrin në 70,000 lekë për m³.
Për vëzhgimin intensiv arkeologjik, tarifat ndryshojnë sipas sipërfaqes së projektit, duke filluar nga 50,000 lekë për projekte më të vogla dhe duke shkuar deri në 500,000 lekë për sipërfaqe mbi 25,000 m². Pagesat bëhen përmes sistemit elektronik e-Leje, dhe faturat miratohen nga drejtori i përgjithshëm i IKTK-së.
Gjithashtu, janë përcaktuar tarifa për shërbimet e Arkivit Teknik, ku përgjigjet dhe dokumentacionet teknike do të kushtojnë nga 1,500 deri në 2,700 lekë, në varësi të formatit dhe mënyrës së dorëzimit, fizike apo digjitale.
Të ardhurat nga këto tarifa do të ndahen pjesërisht në buxhetin e shtetit dhe pjesërisht në buxhetin e IKTK-së, ndërsa organet shtetërore dhe institucionet publike përjashtohen nga pagesat. Udhëzimi ngarkon IKTK dhe Agjencinë Kombëtare të Shoqërisë së Informacionit për zbatimin e tij.
Ky udhëzim synon të rregullojë procedurat dhe të sigurojë transparencë në pagesat për shërbimet arkeologjike dhe dokumentacionin teknik, duke formalizuar një proces që deri më tani ka qenë i shpërndarë dhe jo-standardizuar.
