Nga Etleva Skonja
Çdo ditë që kalon, Partia Demokratike, po përjeton largime të figurave kyçe drejt posteve të reja që udhëhiqen nga Partia Socialiste. Selia e PD-së nxiton t’i quajë tradhtarë ata që largohen, pasi u hoqi poste drejtuese dhe i la në mëshirë të fatit pas shumë vitesh shërbimi për partinë opozitare më të madhe në vend.
Dy nga largimet më të fundit janë Manjola Nikollo, ish-kryetarja e PD-së në Sarandë, e cila u emërua nënkryetare e bashkisë së qytetit bregdetar, dhe Zheni Gjergji, ish-deputete e PD-së, e cila më 21 tetor 2025 njoftoi se është emëruar drejtoreshë e Spitalit të Elbasanit. Sipas saj, vendimi ishte profesional dhe njerëzor, dhe jo politik.
Dorë e brendshme në PD
Burime për “E Vërteta.al”, shprehen se pas shkatërrimit të strukturës së PD-së qëndron Flamur Noka. Ai dyshohet se ka luajtur rol kryesor në largimin e Zheni Gjergjit, Dhurata Çupit, Helidon Bushatit dhe disa figurave të tjera, duke kufizuar mundësitë për t’u angazhuar në PD pavarësisht kontributit të tyre të mëparshëm.
Zheni Gjergji ishte pjesë e kryesisë së PD-së dhe drejtues i Komisionit Parlamentar të Shëndetësisë deri në mars 2024. Megjithëse nuk ishte më deputete, nuk iu caktua ndonjë rol tjetër brenda PD-së.
Dhurata Çupi ishte nënkryetare e PD-së në Komisionin e Ligjeve dhe po ashtu u largua.
Një ditë më parë Çupi, ka kritikuar ashpër veprimet dhe sjelljen e partisë ku ka qenë pjesë.
“Kanë 13 vite ‘opozitarë’, por jetojnë si mazhorancë. Tenderat i marrin nga qeveria, moralin e shesin te opozita. Opozita nuk është strehë për të përfituar, por betejë për të ndryshuar.
Janë po të njëjtët që i përzenë figurat e dobishme intelektuale, dhe pastaj ju turren përse ikin”, shkruan Çupi në një postim të fundit në rrjete sociale.
Helidon Bushati, ish-drejtor politik për Qarkun e Shkodrës,në vitin 2022 dha dorëheqjen pas reflektimit mbi situatën politike brenda PD-së. Në një postim në llogarinë e tij në Facebook, Bushati bën të ditur se vendimi vjen pas një reflektimi të thellë rreth situatës politike dhe zhvillimeve të fundit në PD.
Akuzat ndaj Flamur Nokës
Emri i Flamur Nokës është përfolur për pazare të fshehura me Qeverinë. Në prill 2025, deputeti Agron Shehaj e akuzoi se vëllai i tij merr tendera nga qeveria. Noka e sfidoi Shehajn të paraqiste prova dhe deklaroi se disponon dokumente që vërtetojnë ligjshmërinë e veprimtarisë së tij dhe të familjes.
Flamur Noka lidhet edhe me një kontratë lobuese prej 6 milionë dollarësh në SHBA me kompaninë Continental Strategy, firmosur në prill 2025 për një periudhë 24-mujore. Kontrata ka ngjallur shqetësime për transparencën dhe SPAK ka kërkuar dokumentacion për të verifikuar ligjshmërinë e saj.
Për më tepër, Noka është akuzuar për përfshirje në kontrata të dyshimta, përfshirë një koncesion për prodhimin e pasaportave, ku dyshohet se ka ndihmuar një bashkëfshatar të tij të fitonte para publike përmes BUNK’ART. Kjo ka çuar në kallëzime penale ndaj tij.
