Çmimet globale të naftës kanë shënuar rritje të fortë në tregjet ndërkombëtare, pas përshkallëzimit të tensioneve në Ngushticën e Hormuzit dhe sinjaleve kontradiktore për rifillimin e negociatave mes Shteteve të Bashkuara dhe Iranit.
Kontratat e naftës së papërpunuar Brent u rritën me mbi 7% në tregtimet aziatike, duke reflektuar shqetësimet për furnizimet globale të energjisë, për shkak të situatës së paqëndrueshme në një nga rrugët më strategjike detare për transportin e naftës.
Më vonë gjatë mëngjesit, çmimet u stabilizuan pjesërisht, me Brent që u tregtua rreth 94.69 dollarë për fuçi, nga rreth 90.40 dollarë në fundjavë.
Rritja e çmimeve u ndikua edhe nga deklaratat e Presidentit amerikan Donald Trump, i cili njoftoi sekuestrimin e një anijeje me flamur iranian nga forcat amerikane, si dhe nga raportet për sulme ndaj disa anijeve tregtare në rajon, përfshirë një cisternë dhe një anije kontejnerësh.
Sipas Qendrës së Operacioneve Tregtare Detare të Mbretërisë së Bashkuar (UKMTO), në incidentet e fundit janë përfshirë anije luftarake iraniane dhe goditje me armë gjatë kalimit në ngushticë.
Situata ka ndikuar drejtpërdrejt në tregjet energjetike, pasi Ngushtica e Hormuzit është një prej rrugëve më të rëndësishme globale, ku kalon rreth një e pesta e furnizimit botëror me naftë dhe gaz natyror.
Ndërkohë, tregjet aziatike reaguan me rritje të indeksëve kryesorë, megjithëse mbeten të ndikuara nga pasiguria gjeopolitike dhe frika për përshkallëzim të mëtejshëm të krizës.
