Kremlini deklaroi se vendet evropiane nuk mund të luajnë rolin e ndërmjetësit në konfliktin në Ukrainë, duke argumentuar se Bashkimi Evropian është i pozicionuar qartë në mbështetje të Kievit.

Deklarata u bë nga zëdhënësi i presidentit rus, Dmitry Peskov, i cili gjatë një konference për mediat tha se përfshirja ushtarake dhe mbështetja e vazhdueshme e vendeve evropiane për Ukrainën e bëjnë të pamundur një rol neutral në proceset e ndërmjetësimit.

“Për momentin, Evropa është palë në konflikt përkrah Ukrainës. Të mos harrojmë se armët evropiane po qëllojnë drejtpërdrejt drejt nesh dhe është e pamundur ta injorojmë këtë. Prandaj, natyrisht, Evropa nuk mund të pretendojë se po ndërmjetëson në asnjë mënyrë”, deklaroi Peskov, sipas agjencisë Interfax.

Zëdhënësi i Kremlinit kritikoi gjithashtu qëndrimin e institucioneve evropiane ndaj dialogut me Moskën, duke argumentuar se mungesa e komunikimit po thellon tensionet mes palëve.

“Gabimi më i madh që po bëjnë evropianët dhe qytetarët e Brukselit është që refuzojnë kategorikisht çdo dialog me Rusinë. Por është e pamundur të zgjidhen dhe diskutohen çështjet pa dialog. Ky është shkaku kryesor i ngërçit në marrëdhëniet tona”, tha ai, i cituar nga Tass.

Deklaratat e Kremlinit vijnë në një kohë kur lufta në Ukrainë vazhdon të mbetet një nga pikat më të tensionuara në marrëdhëniet mes Rusisë dhe Perëndimit, ndërsa debati mbi rolin diplomatik të Bashkimit Evropian në proceset e paqes vijon të mbetet i hapur.