Kuvendi ka miratuar disa projektligje që lidhen me sektorin e bujqësisë, ndërsa votimet janë shoqëruar me një qëndrim ndryshe nga deputeti socialist Erion Braçe.
Opozita nuk mori pjesë në votime, pasi vijoi bojkotin e seancës plenare, ndërsa në radhët e mazhorancës Braçe votoi kundër një prej nismave dhe abstenoi në një tjetër.
Projektligji “Për dëftesat tregtare mbi produktet bujqësore” u miratua me 71 vota pro, një abstenim dhe një kundër. Abstenimi ishte i deputetit Erion Braçe, ndërsa kundër votoi deputeti Erald Kapri.
Ndërkohë, projektligji “Për censin e bujqësisë” mori 77 vota pro dhe një votë kundër, e cila ishte sërish e deputetit Kapri.
Edhe ndryshimet në ligjin “Për menaxhimin e kimikateve” u miratuan me 78 vota pro dhe një kundër, ndërsa projektligji për akuakulturën kaloi me 76 vota pro dhe një kundër. Në të dyja rastet vota kundër ishte e deputetit Erald Kapri.
Projektligji “Për mbrojtjen e tokës bujqësore” ishte i vetmi që mori dy vota kundër, nga Erion Braçe dhe Erald Kapri. Nisma u miratua me 78 vota pro.
Këto votime shënuan një nga rastet e fundit ku deputeti socialist Erion Braçe është pozicionuar ndryshe nga shumica e grupit parlamentar të Partisë Socialiste për çështje që lidhen me politikat bujqësore.
