Komisioni Evropian ka propozuar këtë të premte ndryshime të rëndësishme në politikën klimatike të Bashkimit Evropian, të cilat do t’u japin bizneseve më shumë kohë për të reduktuar emetimet e gazrave serrë dhe për të përmbushur objektivat e dekarbonizimit.
Reformat e propozuara synojnë të lehtësojnë rregullat e Sistemit të Tregtimit të Emetimeve (ETS), mekanizmi kryesor i BE-së për kufizimin e ndotjes nga industria, duke i ofruar sektorëve ekonomikë një periudhë më të gjatë tranzicioni drejt prodhimit me emetime më të ulëta të karbonit.
Sipas propozimit, disa industri do të mund të përfitojnë leje për emetimet e karbonit deri në vitin 2038, katër vite më vonë nga afati i parashikuar aktualisht, që është viti 2034. Megjithatë, kjo do të kushtëzohet me angazhimin e kompanive për të investuar në teknologji dhe projekte që kontribuojnë në dekarbonizimin e aktivitetit të tyre.
Komisioneri i Bashkimit Evropian për Klimën, Wopke Hoekstra, deklaroi se ndryshimet synojnë të krijojnë një balancë mes objektivave klimatike dhe konkurrueshmërisë së ekonomisë evropiane.
“Ne po miratojmë një qasje më miqësore ndaj biznesit dhe, më lejoni ta them kështu, më të zgjuar”, u shpreh Hoekstra.
Komisioni Evropian argumenton se rishikimi i rregullave do t’u japë bizneseve më shumë fleksibilitet për t’u përshtatur me tranzicionin e gjelbër, pa cenuar objektivat afatgjata të Bashkimit Evropian për neutralitetin klimatik.
Propozimet e reja do t’i nënshtrohen diskutimeve dhe miratimit nga shtetet anëtare të BE-së dhe institucionet evropiane, një proces që pritet të zgjasë rreth një vit përpara se ndryshimet të hyjnë në fuqi.
