Presidenti turk Recep Tayyip Erdogan ka deklaruar se anëtarësimi i Turqisë në Bashkimin Europian nuk është më një nga prioritetet kryesore të Ankarasë. Në një intervistë për emisionin “Al Muqabala” të Al Jazeera Arabic, Erdogan tha se BE-ja nuk po tregon gatishmëri reale për ta pranuar Turqinë si anëtare me të drejta të plota.
Sipas tij, Ankaraja nuk mund të presë pafundësisht për një proces që nuk po ecën përpara.
“Anëtarësimi në BE nuk është më në krye të agjendës sonë”, është shprehur Erdogan, duke shtuar se nëse Europa nuk avancon drejt integrimit të Turqisë, atëherë, sipas tij, humbja do të jetë e Europës.
Presidenti turk e lidhi këtë qëndrim me atë që e konsideron si mungesë vullneti politik nga vendet europiane për të çuar përpara procesin e anëtarësimit të Turqisë.
Erdogan pret F-35 nga SHBA
Në të njëjtën intervistë, Erdogan foli edhe për marrëdhëniet me Shtetet e Bashkuara dhe çështjen e avionëve luftarakë F-35.
Ai tha se ka marrë një premtim nga presidenti amerikan Donald Trump dhe pret që ai të realizohet.
“Kam marrë një premtim nga Trump lidhur me F-35. Pres që ai të mbahet”, deklaroi Erdogan.
Çështja e F-35 ka qenë prej vitesh një pikë e rëndësishme në marrëdhëniet mes Ankarasë dhe Uashingtonit.
Marrëveshja e mbrojtjes me Arabinë Saudite dhe Pakistanin
Erdogan foli gjithashtu për marrëveshjen e përbashkët të mbrojtjes të nënshkruar më 7 gusht në Mekë nga Turqia, Arabia Saudite dhe Pakistani.
Marrëveshja parashikon që një sulm i armatosur ndaj njërit prej tre vendeve të konsiderohet si sulm ndaj të gjithave.
Sipas Erdogan, marrëveshja dërgoi një mesazh të rëndësishëm për botën dhe mund të zgjerohet në të ardhmen. Ai la të hapur mundësinë që edhe Egjipti të përfshihet në këtë strukturë të re bashkëpunimi.
Hormuzi, Siria dhe Gaza
Një pjesë e intervistës iu kushtua edhe zhvillimeve në Lindjen e Mesme.
Për Ngushticën e Hormuzit, Erdogan tha se prioriteti i Turqisë është rihapja e saj, duke argumentuar se mbajtja e saj e mbyllur nuk i shërben interesave të asnjërës palë.
Ai vlerësoi gjithashtu rolin e Katarit në përpjekjet për ndërmjetësim dhe për t’i dhënë fund konflikteve në rajon.
Sa i përket Sirisë, presidenti turk bëri të ditur se planifikon të vizitojë vendin dhe tha se Turqia do të vazhdojë përpjekjet për stabilizimin e tij.
“Ne nuk do ta lëmë Sirinë vetëm”, tha Erdogan, duke shtuar se edhe komunitetet kurde në Siri duhet të përfitojnë nga paqja dhe stabiliteti.
Për Gazën, presidenti turk përsëriti mbështetjen e Ankarasë dhe deklaroi se Turqia nuk do ta braktisë popullsinë e Gazës.
Ai tha gjithashtu se Hamasi po i përmbush detyrimet e tij “në mirëbesim”, ndërsa akuzoi Izraelin se po vazhdon luftën.
Shqetësim për Libanin dhe Sudanin
Erdogan shprehu shqetësim edhe për sulmet izraelite ndaj Libanit. Sipas tij, kjo çështje është diskutuar edhe me Donald Trump dhe SHBA-ja mund të ketë një rol të rëndësishëm në përpjekjet për t’i dhënë fund konflikteve.
Për Sudanin, presidenti turk tha se Ankaraja do të vazhdojë mbështetjen e saj dhe vlerësoi marrëdhëniet me kreun e Këshillit të Sovranitetit, Abdel Fattah al-Burhan.
Ndërsa për Libinë, Erdogan deklaroi se marrëdhëniet me Ankaranë mbeten të qëndrueshme dhe siguroi se Turqia do të vazhdojë ta mbështesë vendin.
Intervista e presidentit turk vjen në një moment kur Ankaraja po përpiqet të forcojë rolin e saj në disa fronte njëkohësisht, nga marrëdhëniet me Europën dhe SHBA-në, te zhvillimet në Lindjen e Mesme. Deklarata e Erdogan për BE-në tregon se, të paktën në planin politik, anëtarësimi i Turqisë nuk shihet më nga Ankaraja si objektivi kryesor i politikës së jashtme.
