5.72 miliardë euro. Kaq arritën në vitin 2025 shpenzimet e të huajve për udhëtime në Shqipëri, sipas Bilancit të Pagesave të Bankës së Shqipërisë, në zërin “Udhëtime” të llogarisë së shërbimeve. Shifra është më e larta e regjistruar ndonjëherë dhe është rritur me rreth 731.6 milionë euro, ose 14.7%, krahasuar me 4.99 miliardë eurot e vitit 2024.
Po ku përfundojnë paratë e turistëve dhe cilët sektorë po përfitojnë më shumë nga ky bum?
5.72 miliardë euro nga turistët, 2.68 miliardë euro suficit
Bilanci i Pagesave tregon edhe një tjetër shifër të rëndësishme. Në vitin 2025, shqiptarët shpenzuan rreth 3.04 miliardë euro për udhëtime jashtë vendit.
Diferenca mes parave që shpenzuan të huajt në Shqipëri dhe atyre që shqiptarët shpenzuan jashtë vendit e çoi bilancin neto të zërit “Udhëtime” në rreth 2.68 miliardë euro, nga 2.29 miliardë euro në vitin 2024. Pra, vetëm nga ky zë i Bilancit të Pagesave, ekonomia shqiptare pati një suficit prej rreth 392.6 milionë eurosh më shumë se një vit më parë.
Kjo e bën turizmin një prej burimeve kryesore të valutës për ekonominë shqiptare.
Hotelet dhe akomodimi marrin pjesën e parë të faturës
Një pjesë e rëndësishme e parave të turistëve kalon përmes strukturave akomoduese. Të dhënat më të fundit të INSTAT tregojnë se në qershor 2026, numri i vizitorëve të akomoduar në strukturat turistike u rrit me 17% krahasuar me qershorin e vitit të kaluar. Rritja ishte edhe më e fortë te vizitorët e huaj, me 20.6%.
Në të njëjtin muaj u regjistruan 445,846 vizitorë jo-rezidentë, kundrejt 369,683 në qershor 2025. Numri i net-qëndrimeve të vizitorëve të huaj u rrit gjithashtu me 9.2%.
Shifrat e INSTAT tregojnë edhe ku po qëndrojnë këta turistë. Në qershor, 401,836 vizitorë të huaj u akomoduan në hotele dhe struktura të ngjashme, ndërsa 39,457 në akomodime për pushime dhe struktura të tjera afatshkurtra.
Nga hoteli te restoranti
Turisti nuk paguan vetëm për një shtrat. Ai konsumon ushqim, pije, transport, aktivitete, ekskursione dhe produkte të ndryshme. Për këtë arsye, efekti i 5.72 miliardë eurove shtrihet përtej industrisë së hotelerisë.
Banka e Shqipërisë e ka lidhur zgjerimin e aktivitetit ekonomik me performancën e turizmit, ndërsa të dhënat e Bilancit të Pagesave tregojnë se suficiti i përgjithshëm i shërbimeve në vitin 2025 arriti rreth 4.5 miliardë euro, me turizmin si komponentin kryesor.
Kjo do të thotë se një pjesë e parasë së turistëve përfundon edhe te transporti dhe shërbime të tjera që mbështesin lëvizjen dhe konsumin e vizitorëve.
Bizneset po ndjekin paratë
Një tregues tjetër është numri i bizneseve që po hyjnë në këtë treg. Akomodimi dhe shërbimi ushqimor janë ndër aktivitetet ku sipërmarrja po zgjerohet, pikërisht sepse kërkesa nga turistët është rritur.
Pas çdo vizitori qëndron një zinxhir pagesash si hoteli, restoranti, taksia, makina me qira, supermarketi, guida, agjencia turistike dhe bizneset që furnizojnë këto aktivitete. Sa më gjatë të qëndrojë turisti dhe sa më shumë të konsumojë gjatë qëndrimit, aq më e madhe është vlera ekonomike që krijohet.
Por, Jo të gjithë bizneset fitojnë njësoj. Fakti që të huajt shpenzuan 5.72 miliardë euro në Shqipëri nuk do të thotë që kjo shumë u kthye në fitim për bizneset.
Nga këto të ardhura paguhen paga, qira, energji, furnizime, produkte të importuara, kredi, taksa dhe një sërë kostosh të tjera.
Prandaj, pyetja nuk është vetëm se sa para sjell turizmi, por sa prej tyre mbeten realisht në ekonominë shqiptare dhe te cilët biznese përfundojnë.
Një resort i madh në bregdet, një apartament i dhënë me qira ditore në një zonë turistike, një restorant, një taksi apo një dyqan i vogël nuk kanë të njëjtën peshë në këtë zinxhir.
Kush po merr pjesën më të madhe të tortës?
Të dhënat zyrtare nuk japin një ndarje të 5.72 miliardë eurove sipas kategorive “hotel”, “restorant”, “transport” apo “tregti”. Për këtë arsye, nuk mund të thuhet me saktësi se cili prej këtyre sektorëve ka marrë një shumë të caktuar nga kjo shifër.
Por, të dhënat e aktivitetit tregojnë qartë se akomodimi është një prej përfituesve të drejtpërdrejtë, ndërsa konsumi i turistëve gjeneron aktivitet edhe në ushqim, transport, tregti dhe shërbime.
Vetëm në qershor 2026, vizitorët e huaj në strukturat akomoduese u rritën me 20.6%, ndërsa numri i përgjithshëm i vizitorëve të akomoduar u rrit me 17%. Kjo tregon se fluksi nuk është thjesht një statistikë kufitare, por ai po kthehet në aktivitet konkret për bizneset.
Dhe kjo është sfida e radhës për ekonominë shqiptare. Pyetja nuk është më nëse turizmi po sjell para, por sa prej këtyre parave po mbeten në vend, sa po kthehen në investime dhe kush po merr pjesën më të madhe të kësaj torte.
Sepse rekordi prej 5.72 miliardë eurosh është vetëm ana e parë e historisë. Ana tjetër është ajo që ndodh me këto para pasi turisti hap portofolin.
