Forcat speciale amerikane kanë zhvilluar për rreth katër muaj një mision sekret për zbulimin dhe pastrimin e minave në Ngushticën e Hormuzit, në përpjekje për të rikthyer sigurinë në një nga rrugët më të rëndësishme të transportit detar në botë.
Lajmi është raportuar nga Financial Times, sipas të cilit operacioni u zhvillua gjatë një periudhe të tensionuar, mes shkëmbimeve të vazhdueshme të sulmeve mes Shteteve të Bashkuara dhe Iranit në zonën përreth ngushticës.
Në operacion u angazhuan zhytës të Navy SEAL, të cilët punuan së bashku me anije pa pilot, robotë dhe pajisje të specializuara nënujore për të identifikuar dhe hequr minat e dyshuara se ishin vendosur nga Irani. Sipas raportimit, ekipet amerikane shpesh operonin gjatë natës.
Synimi kryesor ishte krijimi i një korridori më të sigurt për anijet tregtare, të cilat në masë të madhe kishin shmangur Ngushticën e Hormuzit që prej sulmeve të SHBA-së dhe Izraelit ndaj Iranit në shkurt.
Teherani kishte deklaruar se kishte vendosur mina në ujërat ndërkombëtare dhe në ujërat e Omanit pas nisjes së luftës.
Rreziku nga minat detare kishte ngritur shqetësim të madh për transportin ndërkombëtar. Organizata Ndërkombëtare Detare vlerësoi në qershor se rreth 80 mina ishin vendosur përgjatë disa prej rrugëve kryesore të transportit detar.
Ndërkohë, presidenti amerikan Donald Trump deklaroi javën e kaluar se “të gjitha minat” në ujërat ndërkombëtare të Ngushticës së Hormuzit ishin hequr ose shkatërruar. Pretendimi i tij u konfirmua më pas edhe nga ushtria amerikane.
