Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Policia e Shtetit ka shpjeguar arsyet e daljes në terren të forcave speciale RENEA gjatë protestës së djeshme në Tiranë. Sipas autoriteteve, vendimi u mor pas një telefonate në sallën operative të Policisë së Tiranës, ku pretendohej se mes protestuesve kishte persona të armatosur dhe po qëllohej me armë zjarri.
Inspektori i Sigurisë Publike, Albert Nushi, deklaroi se ndërhyrja e forcave speciale synonte mbrojtjen e efektivëve të policisë, të cilët, sipas tij, po përballeshin me sulme me gurë, pllaka trotuari, sende metalike, lëndë piroteknike dhe bomba Molotov.
Sipas Policisë, gjatë protestës u plagosën 37 efektivë, ndërsa në Tiranë u shoqëruan 54 persona. Prej tyre, 27 u arrestuan dhe 27 të tjerë u proceduan penalisht. Në Shkodër dhe Vlorë, 19 persona të tjerë u proceduan për veprime të kundërligjshme gjatë tubimeve.
Në kuadër të hetimeve, Policia bëri të ditur se janë sekuestruar një karikator me fishekë luftarakë, dy bomba Molotov, doza kanabisi, vida dhe sfera metalike, të cilat, sipas autoriteteve, dyshohet se janë përdorur gjatë sulmeve.
Policia pretendon gjithashtu se grupe personash të maskuar kanë dëmtuar institucione shtetërore, banka dhe prona publike e private, si dhe i kanë vënë zjarrin hyrjes së godinës së Gjykatës së Lartë.
Në deklaratën e saj, Policia u bëri thirrje protestuesve të distancohen nga personat e dhunshëm dhe të ushtrojnë të drejtën e tubimit në mënyrë paqësore. Ajo hodhi poshtë edhe lajmet për praninë e oficerëve të policive partnere në menaxhimin e protestës, duke i cilësuar të pavërteta.
Sqarimi i Policisë vjen pas daljes së RENEA-s në protestë, ndërsa pretendimi për praninë e personave të armatosur dhe të shtënat me armë zjarri mbetet pjesë e informacionit të raportuar nga telefonata në sallën operative, sipas versionit zyrtar të autoriteteve.
