Kryetari i Partisë Demokratike, Sali Berisha, ka hedhur akuza të forta ndaj ministrit të Bujqësisë, Niko Peleshi, dhe ish-drejtorit të Portit të Durrësit, Pirro Vengu.
Në një deklaratë për mediat, Berisha tha se Peleshi është përgjegjës për importimin e 4.3 ton pesticideve të ndaluara, të cilat sipas tij përbëjnë rrezik për gjithë rajonin. “Peleshi solli pesticide të shkallës më helmuese, merkurialë dhe fosfororganikë, që helmonin i gjithë Ballkani. Importi i tyre ishte i ndaluar si nga ligji shqiptar ashtu edhe nga ai evropian,” u shpreh ai.
Më tej, Berisha shtoi se Peleshi ka mbështetjen e kryeministrit Rama dhe të drejtuesve të drejtësisë, duke e cilësuar vendosjen e tij në postin e dytë më të lartë të shtetit si “një skandal”.
Ndërkohë, për Pirro Vengun, ish-drejtuesin e Portit të Durrësit, Berisha deklaroi se ka qenë i lidhur me “kartelin Troplini” dhe se gjatë periudhës së drejtimit të tij porti u kthye në bazë të grupeve kriminale. Sipas tij, në atë kohë “asnjë kilogram kokainë nuk është kapur, ndërkohë që çdo emërim e çdo lëvizje në port bëhej me miratimin e kartelit”.
Berisha e akuzoi gjithashtu Vengun për firmosjen e marrëveshjes që, sipas tij, “i kaloi portin e Durrësit kompanisë së Alabbar-it, duke kryer një krim të përmasave të mëdha”.
