Erion Veliaj, ka zbuluar strategjinë e radhes për të ikur edhe për pak orë nga duart të SPAK-ut, duke kërkuar të jetë i pranishëm dhe të dëgjohet personalisht në mbledhjen e javës tjetër të Këshillit Bashkiak, ku pritet të vendoset për shkarkimin e tij.
Veliaj e paraqet mungesën e tij të deritanishme si pasojë të një mase sigurie “disproporcionale”, duke paralajmëruar se do ta kundërshtojë çdo vendim deri në Gjykatën Evropiane të të Drejtave të Njeriut. Sipas tij, masa e gjykatës ka ndërprerë në mënyrë të padrejtë mandatet kushtetuese dhe ka paralizuar qeverisjen e kryeqytetit, duke lënë mbi 1 milion qytetarë pa përfaqësim të zgjedhur.
Dosja e Veliajt në gjykatë/ Akuzat për përfitime personale dhe konflikt interesi
Në një mesazh të fortë politik, Veliaj thekson se mandati nuk është personal, por i qytetarëve të Tiranës, dhe çdo përpjekje për ta shkarkuar atë pa dëgjuar argumentet e tij do të krijonte precedent të rrezikshëm për demokracinë vendore. Strategjia e tij duket e qartë: duke folur personalisht para Këshillit Bashkiak, Veliaj kërkon të ruajë kontrollin mbi narrativën politike dhe të minimizojë ndikimin e hetimeve të SPAK-ut.
Nga mbështetje te firmat për shkarkim/ Kthesa e socialistëve ndaj Veliajt
Ky zhvillim vjen në një moment delikat, teksa SPAK vijon hetimet mbi disa çështje që lidhen me Bashkinë e Tiranës, duke e vendosur Veliajn në qendër të një konflikti të fortë ligjor dhe politik. Veprimi i tij tregon një përpjekje për të sfiduar institucionet e drejtësisë dhe për të mbrojtur pozicionin e tij, ndërkohë që tensionet politike në kryeqytet arrijnë kulmin.
Letra drejtuar Anëtarëve të Këshillit Bashkiak të Tiranës:
E nderuar kryetare dhe anëtarë të Këshillit Bashkiak,
Jam informuar nga media se, më datë 23 shtator 2025, do të mbahet mbledhja e Këshillit Bashkiak të Tiranës, me objekt miratimin e propozimit drejtuar Këshillit të Ministrave për shkarkimin tim nga funksioni i Kryetarit të Bashkisë, me arsyetimin e mungesës mbi tre muaj në detyrë.
Dua të theksoj qartë se kjo mungesë nuk është pasojë e vullnetit tim, por rrjedhojë e një mase sigurie disproporcionale dhe që do të kundërshtohet në çdo instancë gjyqësore, deri në Gjykatën Evropiane të të Drejtave të Njeriut.
Kjo masë nuk ka izoluar vetëm qytetarin Erion Veliaj, por ka paralizuar qeverisjen e kryeqytetit, duke lënë pa drejtues të zgjedhur mbi 1 milion qytetarë të Tiranës. Sistemi gjyqësor, në mungesë të një përgjegjësie të plotë për fuqinë dhe pasojat e vendimeve të tij, nuk mori parasysh se masa e sigurimit duhej të balanconte interesin publik të hetimit penal me interesin po aq madhor të garantimit të qeverisjes vendore. Kjo është arsyeja reale që ka prodhuar krizën e sotme politike, institucionale dhe kushtetuese. Shkaktar i saj nuk është as Kryetari i Partisë Socialiste, as Partia Socialiste, as ju këshilltarë, por një vendimmarrje gjyqësore që ka ndërprerë në mënyrë të padrejtë një mandat kushtetues. Çdo përpjekje për ta fshehur këtë të vërtetë nuk i shërben zgjidhjes, por e devijon atë.
Mungesa e imponuar nga një masë paraprake, jo nga një vendim përfundimtar fajësie, nuk është as mungesë e vullnetshme, as shkelje e rëndë kushtetuese, por cenim i hapur i parimit të përfaqësimit demokratik dhe një precedent i rrezikshëm për qeverisjen vendore.
E mirëkuptoj shqetësimin tuaj për të kërkuar një zgjidhje politike. Por nuk mund të mirëkuptoj që kjo krizë, e shkaktuar nga gjykata dhe ku “viktimë” është vetëqeverisja vendore, të “zgjidhet” me një tjetër shkelje të Kushtetutës po nga vetë pushteti vendor. Një vendim i tillë do të zëvendësonte vullnetin e 160 mijë zgjedhësve, të cilët kanë folur politikisht, me një akt të pajustifikuar juridikisht, duke krijuar precedent të rrezikshëm për demokracinë vendore.
E kam thënë dhe e përsëris, dhe dua të më besoni siç keni bërë gjithë këto vite: nuk bëhet fjalë për interesin tim personal. Mandati nuk është i imi, por i qytetarëve të Tiranës, të cilët për herë të tretë më kanë dhënë nderin e jetës sime duke më besuar drejtimin e qytetit. Mandati nuk më ka mbrojtur mua, përkundrazi, është arsyeja pse unë sot jam i izoluar, por ai më detyron të mbroj kontratën katërvjeçare që qytetarët kanë firmosur me votën e tyre. Kam detyrimin të mbroj çdo pikë djerse që kemi derdhur së bashku për ta fituar atë besim.
Kryetari i Bashkisë së Tiranës është organ kushtetues që ka të drejtën dhe Këshilli Bashkiak i Tiranës ka detyrimin të respektojë procesin e rregullt ligjor në çdo vendimmarrje që bën. Për këto arsye dhe në respekt të parimit kushtetues të procesit të rregullt ligjor dhe të së drejtës për t’u dëgjuar, kërkoj të jem i pranishëm dhe të dëgjohem në mbledhjen e këshillit bashkiak, për të dhënë sqarimet e nevojshme para se të merret vendimi për propozimin e shkarkimit tim.
Kryetari i Bashkisë së Tiranës,
Erion Veliaj
