Presidenti i Republikës, Bajram Begaj, ka dekretuar sot 7 ligje të rëndësishme në fushën fiskale, të cilat synojnë të përmirësojnë klimën e biznesit dhe të lehtësojnë barrën tatimore për qytetarët dhe bizneset. Ndër këto ligje, veçanërisht të rëndësishme janë marrëveshja për paqen fiskale dhe falja e detyrimeve tatimore e doganore më të vjetra se 10 vjet.
Drejtoria e Përgjithshme e Tatimeve sqaron se paqja fiskale do të funksionojë si një marrëveshje midis administratës tatimore dhe bizneseve, e lehtësuar nga përdorimi i Inteligjencës Artificiale. Ky sistem synon të shmangë kontrollet tatimore të detyruara, të përmirësojë klimën e biznesit dhe njëkohësisht të sigurojë mbledhjen e detyrimeve tatimore përmes një tatimi të dakordësuar mbi fitimin.
Tatimpaguesit mund të aplikojnë për lidhjen e kësaj marrëveshjeje, ku tatimi do të dakordësohet mbi një formulë që bazohet në fitimet e deklaruara dhe një marzh fitimi ekstra. Përfitues kryesorë janë bizneset e mëdha me fitime mbi 14 milionë lekë, të cilat nuk kanë detyrime të papaguara dhe nuk janë dënuar me vendim të formës së prerë.
Ligji i dytë i rëndësishëm i dekretuar është falsimi i detyrimeve të vjetra, i cili parashikon faljen e të gjitha detyrimeve tatimore dhe doganore të papaguara, si dhe gjobave dhe kamatëvonesave, për periudhat tatimore deri më 31 dhjetor 2014. Ky vendim përfshin rreth 207 mijë biznese dhe parashikohet që të falë detyrime që arrijnë afro 1 miliardë euro, duke ofruar një lehtësim të ndjeshëm për ekonominë e vendit.
Qeveria thekson se zbatimi i këtyre ligjeve do të ndihmojë në rritjen e besueshmërisë së biznesit, shmangien e mosmarrëveshjeve me administratën tatimore dhe përmirësimin e mbledhjes së të ardhurave në mënyrë të drejtë dhe transparente.
