Presidenti i Shteteve të Bashkuara, Donald Trump, ka deklaruar se është i bindur që Irani do të ulet në tryezën e negociatave, duke paralajmëruar për pasoja të rënda në të kundërt.

Në një intervistë telefonike për emisionin radiofonik The John Fredericks Show, Trump u shpreh se “ata do të negociojnë, dhe nëse nuk e bëjnë, do të përballen me probleme që nuk janë parë kurrë më parë”.

Ai theksoi se shpreson që Irani të arrijë një marrëveshje të drejtë dhe të përqendrohet në rindërtimin e vendit, por nënvizoi se një gjë është e panegociueshme: Teherani nuk duhet të ketë armë bërthamore.

“Kur ta bëjnë këtë, nuk do të kenë armë bërthamore. Nuk do të kenë qasje në to, as mundësi për t’i siguruar. Ne nuk mund ta lejojmë që kjo të ndodhë,” tha Trump, duke shtuar se një skenar i tillë mund të ketë pasoja globale.

Deklaratat e tij vijnë në një moment tensionesh të vazhdueshme mes SHBA-së dhe Iranit lidhur me programin bërthamor të këtij të fundit dhe mundësinë e një marrëveshjeje të re ndërkombëtare.