Qeveritë e Bashkimit Europian po diskutojnë mundësinë e emërimit të një figure të lartë politike europiane për të zhvilluar negociata të mundshme me presidentin rus Vladimir Putin, në kuadër të përpjekjeve për rihapjen e kanaleve të dialogut me Moskën.

Sipas raportimit të “Financial Times”, në tryezën e diskutimeve janë përmendur emrat e ish-presidentit të Bankës Qendrore Europiane, Mario Draghi, dhe ish-kancelares gjermane Angela Merkel.

Gazeta britanike shkruan se ministrat e Jashtëm të vendeve të BE-së pritet të diskutojnë meritat e kandidatëve potencialë gjatë një takimi në Qipro javën e ardhshme. Debati vjen në një kohë kur, sipas burimeve të informuara mbi bisedimet, si Uashingtoni ashtu edhe Kievi kanë shprehur mbështetje për një dialog të drejtpërdrejtë mes Europës dhe Kremlinit për luftën në Ukrainë.

E pyetur nëse do të ishte e gatshme të merrte një rol të tillë, Angela Merkel ka deklaruar se figura të tjera mund të jenë më të përshtatshme, duke argumentuar se Putini i merr seriozisht vetëm liderët aktualisht në pushtet.

Ndërkohë, kancelari gjerman Friedrich Merz, i pyetur për emrin e Merkelit, ka konfirmuar se partnerët europianë po e diskutojnë “në thellësi” këtë çështje, por ka shmangur komentet për kandidatë konkretë.

Sipas “Financial Times”, takimi i ministrave të Jashtëm të BE-së do të fokusohet gjithashtu te marrëdhënia e ardhshme e Europës me Rusinë pas konfliktit, vijat e kuqe për një marrëveshje të mundshme në Ukrainë dhe kushtet paraprake për nisjen e çdo negociate me Kremlinin.