Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kreu i PD-së, Sali Berisha, ka reaguar me tone ironike ndaj intervistës së dhënë nga kryeministri Edi Rama për gazetën estoneze “Postimees”, ku kreu i qeverisë shqiptare kritikoi Europën për qasjen ndaj Rusisë.
Gjatë një deklarate për mediat, Berisha u ndal fillimisht te përgjigjet e Ramës lidhur me akuzat për korrupsion, për të cilat tha se kryeministri reagoi duke i cilësuar si “budallallëqe”.
Sipas Berishës, Rama “ka humbur mendjen” dhe po sillet si një “influencues rus”, ndërsa ironizoi edhe mënyrën se si kryeministri shqiptar iu referua presidentit rus Vladimir Putin.
“Ka filluar t’i japë këshilla Europës për Rusinë. U thotë që Vladimir Vladimiroviç, i drejtohet Putinit sikur të ishte nëpunës në administratën ruse”, deklaroi Berisha.
Ai shtoi se përdorimi i këtij emërtimi për Putinin është tipik për administratën ruse dhe ironizoi duke thënë: “Se ia tha Vuçiç, se kush ia tha, këtë thoshte atje”.
Deklaratat e Berishës vijnë pas intervistës së Ramës në Estoni, ku kryeministri shqiptar u shpreh se Bashkimi Europian gaboi duke ia deleguar SHBA-së komunikimin dhe negociatat me Rusinë, ndërsa kërkoi që Europa të luajë një rol më aktiv diplomatik në raport me Moskën.
