Përmes një videoje të publikuar në rrjetet sociale, Kryemadhi deklaroi se kishte zbuluar personin që, sipas saj, financon sulmet mediatike kundër saj.

“E zbulova se kush ishte investitori strategjik i tyre dhe nuk ishte njeri tjetër veçse ish-luftëtari im i opozitës, Lulzim Basha”, u shpreh ajo.

Ish-kryetarja e LSI-së paralajmëroi gjithashtu se çështja e financimeve ruse për lobime në Shtetet e Bashkuara pritet të rikthehet në vëmendjen e Struktura e Posaçme kundër Korrupsionit dhe Krimit të Organizuar.

“Dosja e financimit rus për lobim në SHBA vërtet ka zënë pluhur në zyrat e SPAK, por nuk është mbyllur dhe një ditë do të hapet”, deklaroi Kryemadhi.

Ajo paralajmëroi edhe gazetarët dhe portalet që, sipas saj, financohen nga Basha, duke ngritur dyshime mbi origjinën e fondeve që përdoren për pagesa mediatike.

“Kur të merrni ato zarfera me lekë, të dini origjinën e atyre parave, sepse nesër mund të thuhet se me para ruse është financuar media e lirë”, tha Kryemadhi në reagimin e saj.

Në deklaratë, ajo përmendi gjithashtu lidhjet e Bashës me fondacione dhe gazetarë, duke e cilësuar atë si “ish-student të Soros”, ndërsa akuzoi disa media për përfshirje në një fushatë shpifëse dhe denigruese ndaj saj.