Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Arben Ahmetaj, i cili prej vitit 2023 është në kërkim nga drejtësia shqiptare, po shfaqet sërish në qendër të zhvillimeve hetimore, këtë herë pas denoncimeve që ka bërë nga Zvicra.
Ish-zëvendëskryeministri ka publikuar audiopërgjime dhe ka ngritur akuza për biznesmenin Ron Yeffet, kompaninë shtetërore KAYO dhe kompani të tjera të lidhura me industrinë e mbrojtjes. Pas deklaratave të tij, SPAK ka nisur verifikimet.
Prokuroria e Posaçme ka kërkuar materialin e plotë të emisionit ku Ahmetaj bëri deklaratat, përfshirë audiopërgjimet bruto. Më pas, hetimi ka kaluar në veprime konkrete, me kontrolle të raportuara në banesa dhe ambiente të personave të lidhur me çështjen, si dhe sekuestrime materialesh.
Në fokus të denoncimeve të Ahmetajt janë pretendime për një skemë të dyshuar që lidhet me trafikun e armëve dhe aktivitetin e kompanive në sektorin e mbrojtjes. Këto janë pretendime të Ahmetajt, ndërsa verifikimi i tyre i takon SPAK-ut dhe në fund gjykatës.
Por kjo nuk është hera e parë që një denoncim i Ahmetajt pasohet nga veprime të Prokurorisë së Posaçme.
Më herët, ish-zëvendëskryeministri kishte akuzuar publikisht biznesmenin Ergys Agasi, duke e cilësuar si një person me rol ndërmjetësues mes pushtetit dhe botës së krimit.
Agasi u arrestua në gusht 2026, ndërsa ndaj tij SPAK kishte zhvilluar një procedim që përfshinte akuza për konkurrencë të paligjshme, shkelje të barazisë në tendera, grup të strukturuar kriminal, korrupsion aktiv dhe pastrim të produkteve të veprës penale.
Kështu, emri i Agasit dhe më pas çështja KAYO-Ron Yeffet janë dy prej rasteve ku denoncimet publike të Ahmetajt janë ndjekur nga veprime të organeve të drejtësisë.
Por në të njëjtën kohë, vetë Ahmetaj është në anën tjetër të një dosjeje të SPAK-ut.
Çfarë akuzash ka ngritur SPAK ndaj Ahmetajt
SPAK e ka hetuar Ahmetajn në procedimin penal nr. 277/1 të vitit 2022. Në korrik 2023, Prokuroria e Posaçme kërkoi arrestimin e tij dhe kontrollin e banesave e pasurive, ndërsa ndaj tij rëndonin akuza për korrupsion pasiv të funksionarëve të lartë, mosdeklarim ose fshehje të pasurisë dhe pastrim të produkteve të veprës penale.
Në korrik 2023, SPAK njoftoi edhe sekuestrimin e gjashtë pasurive të lidhura me Ahmetajn, mes tyre katër apartamente dhe dy llogari bankare me rreth 124 mijë euro.
Pas përfundimit të hetimeve, në mars 2026 SPAK njoftoi se e kishte dërguar për gjykim procedimin me 11 të pandehur, mes tyre edhe Arben Ahmetajn.
Sipas SPAK, ndaj Ahmetajt janë ngritur nëntë episode të korrupsionit pasiv të funksionarëve të lartë. Prokuroria përshkruan episode që lidhen me përfitime të dyshuara përmes marrëdhënieve me Klodian Zoton dhe Mirel Mërtirin, përfshirë punime në apartament, shitje që SPAK i konsideron fiktive, pasurinë në Hamallaj dhe shpenzime udhëtimi.
Në kuadër të kësaj dosjeje, SPAK ka regjistruar edhe një fraksion për pastrim parash, lidhur me një transfertë prej rreth 3 milionë eurosh, për të cilën janë kryer verifikime mbi lëvizjen e parave.
Përveç dosjes së inceneratorëve, Arben Ahmetaj është i pandehur edhe në dosjen “Buka”, ku SPAK e akuzon për shpërdorim detyre lidhur me privatizimin e shoqërisë “Buka” sh.a. Sipas akuzës, veprimet e tij në kohën kur drejtonte Ministrinë e Financave i kanë shkaktuar buxhetit të shtetit një dëm ekonomik të përllogaritur rreth 7 miliardë lekë. Çështja është tashmë në gjykim në GJKKO dhe zhvillohet në mungesë të Ahmetajt.
Pra, Ahmetaj është sot njëkohësisht i pandehur në një çështje të SPAK-ut dhe denoncues publik i çështjeve të tjera që po verifikohen nga e njëjta prokurori. Ai vijon të qëndrojë në Zvicër dhe herë pas here shfaqet në intervista, ku publikon akuza dhe materiale të reja.
Pas publikimit të tyre, SPAK ka kaluar nga verifikimi i deklaratave në veprime konkrete hetimore.
Ndërsa drejtësia shqiptare e kërkon për t’u përballur me akuzat në çështjen e tij penale, denoncimet që ai bën nga jashtë vendit po prodhojnë njëkohësisht hetime të reja në Shqipëri.
E Vërteta.al
Tenderat e Ergys Agasit/ Policia kërcënoi biznesmenin Gerond Meçe, bandat e morën peng
KAYO dhe privatët nën lupë/ Kujdestaria e armëve në Shqipëri në duar të panjohura?
Përgjimet e Ahmetajt në SPAK/ Braho kërkon materialin bruto për akuzat ndaj Yefet dhe KAYO
Trafiku i armëve dhe KAYO/ BKH kontrolle në Ministrinë e Mbrojtjes dhe te Ron Yefet
Përgjimet e Ahmetajt/ SPAK zbarkon te Ardi Veliu dhe Arjeta Puca
