Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ambasada e Izraelit në Tiranë ka njoftuar mbylljen e aktivitetit të saj deri në një njoftim të dytë, për shkak të zhvillimeve të fundit dhe situatës së krijuar nga protestat në kryeqytet. Ndryshe nga përfaqësi të tjera diplomatike që kanë bërë thirrje për shmangien e dhunës, ambasada izraelite ka vendosur të pezullojë punën, pa përcaktuar një datë për rihapjen.
Njoftimi është publikuar në faqen zyrtare të ambasadës, ku bëhet e ditur se institucioni është aktualisht i mbyllur dhe se rikthimi në aktivitet do të varet nga ecuria e situatës.
“Për shkak të zhvillimeve të fundit, Ambasada e Izraelit në Tiranë është aktualisht e mbyllur. Rihapja e Ambasadës do të varet nga mënyra se si do të zhvillohet situata”, thuhet në njoftimin e përfaqësisë diplomatike.
Ambasada ka sqaruar se qytetarët që kanë nevojë për shërbime urgjente konsullore mund të kontaktojnë numrin celular të emergjencës.
Vendimi vjen në një moment kur protestat në Tiranë kanë sjellë tensione dhe përplasje mes protestuesve dhe forcave të policisë. Në ditët e fundit, situata në kryeqytet ka tërhequr vëmendjen edhe të përfaqësive diplomatike, disa prej të cilave kanë reaguar duke bërë thirrje për përmbajtje dhe shmangie të dhunës.
Megjithatë, sipas informacionit të disponueshëm, Ambasada e Izraelit është e vetmja përfaqësi e identifikuar në këtë rast që ka njoftuar mbylljen e saj për një periudhë të pacaktuar, në vend që të kufizohet vetëm te një apel publik për qetësi.
