KreuDrejtësiaSkandali i Postës shkon në SPAK/ Dyshime për përfshirjen e deputetëve

Skandali i Postës shkon në SPAK/ Dyshime për përfshirjen e deputetëve

Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR

 

Dosja e vjedhjes së 69 milionë lekëve të reja në filialin e Postës Shqiptare në Durrës ka kaluar në duart e Prokurorisë së Posaçme (SPAK), pas dyshimeve se pas skemës mund të fshihet një grup i strukturuar kriminal dhe se në të mund të jenë përfshirë edhe persona me imunitet parlamentar.

Prokuroria e Durrësit ka shpallur moskompetencën për hetimin e çështjes dhe ia ka përcjellë dosjen SPAK-ut, duke i hapur rrugë verifikimit të dyshimeve për përfshirjen e personave me funksione publike dhe ish-zyrtarëve të Postës Shqiptare.

Sipas informacioneve të gazetares së Top Channel, Anila Hoxha, në skemën e dyshuar mund të jenë përfshirë edhe ish-zyrtarë të Postës që aktualisht gëzojnë imunitet parlamentar.

Në këtë kontekst përmendet edhe emri i Etleva Budinit, ish-drejtoreshës së Postës Shqiptare, e cila në zgjedhjet e fundit parlamentare kandidoi nën siglën e Partisë Socialiste dhe fitoi mandatin e deputetes. Megjithatë, deri më tani nuk bëhet fjalë për një përgjegjësi penale të provuar ndaj saj.

Ndërkohë, në një zhvillim tjetër të dosjes, Gjykata e Durrësit ka ndryshuar masën e sigurisë për Elisabeta Matajn, pasardhësen e Budinit në drejtimin e Postës. Ajo, e arrestuar menjëherë pas zbulimit të skandalit, është transferuar nga masa “arrest në burg” në “arrest në shtëpi”.

Vendimi është marrë pas kërkesës së Matajt dhe mbrojtjes së saj, e cila ka kundërshtuar pretendimet e prokurorisë se provat e mbledhura gjatë hetimit kanë rënduar pozitën e saj procedurale.

Mataj ndodhej në paraburgim që prej 18 korrikut dhe hetohet për veprën penale të vjedhjes në bashkëpunim, përmes shpërdorimit të detyrës, lidhur me zhdukjen e 69 milionë lekëve. Sipas hetimeve, këto fonde ishin të destinuara për qytetarët në degët e Postës në Shijak dhe Krujë.

Në të njëjtën çështje janë nën hetim edhe ish-shefja e financës, Valbona Duni, dhe arkëtarja Paola Dana. Të dyja ndodhen nën masën e sigurisë “arrest në shtëpi”.

Kalimi i dosjes në SPAK e zgjeron hetimin përtej personave të arrestuar fillimisht, ndërsa mbetet për t’u sqaruar nëse dyshimet për përfshirjen e personave të tjerë, përfshirë funksionarë me imunitet parlamentar, do të mbështeten me prova nga hetimi i Prokurorisë së Posaçme.

spot_img
ARTIKUJ TË NGJASHËM
- Advertisment -spot_img

Më të Lexuarat