Kreu i Partisë Demokratike,, ka reaguar pas rizgjedhjes së tij në krye të partisë, duke vënë theksin tek, siç tha ai, rreth 40 mijë vota të marra nga anëtarësia në procesin zgjedhor.
Në një deklaratë të gjatë publike, Berisha e cilëson procesin e zgjedhjes së kryetarit si një dëshmi të demokracisë së brendshme në Partinë Demokratike, duke theksuar modelin “një anëtar, një votë” si formën më të lartë të përfaqësimit brenda partive politike.
Sipas tij, mënyrat e zgjedhjes së drejtuesve të partive ndryshojnë në vende të ndryshme, por votimi i drejtpërdrejtë nga anëtarësia përbën, sipas tij, një nga format më demokratike të organizimit politik.
Berisha shton se kjo praktikë, që ai e cilëson si “demokraci direkte”, është ende në pakicë në Europë, por po fiton terren si model për rritjen e pjesëmarrjes së anëtarëve në vendimmarrje.
Duke e krahasuar Partinë Demokratike me Partinë Socialiste, Berisha akuzon kundërshtarët politikë se nuk zhvillojnë procese të brendshme zgjedhore për drejtimin e partisë, por mbështeten në emërime dhe kontroll të brendshëm, duke i quajtur ato “parti të kapura nga krimi”.
“PD i zgjedh drejtuesit me demokraci direkte, ndërsa PS ka zëvendësuar votën me emërimin dhe fuqinë e krimit”, deklaron ai, duke shtuar se Partia Socialiste nuk ka zhvilluar zgjedhje të brendshme për kryetarin apo forumet drejtuese prej vitesh.
Në reagimin e tij, Berisha i kundërpërgjigjet edhe kritikëve që e kanë cilësuar procesin zgjedhor në PD si të mbyllur apo të kontrolluar, duke theksuar se vota e anëtarësisë përbën, sipas tij, një proces të hapur dhe të drejtpërdrejtë demokratik.
Ai shprehet se akuzat për “privatizim të partisë” janë të pabaza dhe të motivuara politikisht, duke i cilësuar kundërshtarët si pjesë e një, siç thotë ai, fushate kundër opozitës.
Berisha thekson se rreth 40 mijë votat e marra në procesin e fundit përbëjnë një, siç e quan ai, “triumf të dinjitetit të demokratëve” dhe një mesazh të qartë politik për kundërshtarët e tij.
Sipas tij, ky rezultat ka shkaktuar shqetësim tek kundërshtarët politikë, të cilët ai i akuzon për përpjekje për të delegjitimuar procesin zgjedhor brenda Partisë Demokratike.
