Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Deputetja e Partia Demokratike, Ina Zhupa, ka reaguar ndaj deklaratave të kryetarit të grupit parlamentar të Partia Socialiste, Taulant Balla, duke e akuzuar për standard të dyfishtë në raport me vendimet e gjykatave.
Në një reagim në rrjetet sociale, Zhupa u shpreh se Balla, përpara se të kritikojë gjyqtarët publikisht, duhet të kujtojë qëndrimet e tij të mëparshme, kur sipas saj, në cilësinë e ministrit, ai ka njohur dhe respektuar vendimet e gjykatës administrative.
“Para se të bëjë video duke anatemuar gjyqtarët, le të dëgjojë veten si ministër kur njihte dhe respektonte vendimet e gjykatës administrative. Bëhet fjalë për të njëjtin rast dhe të njëjtin gjyqtar,” shkruan Zhupa.
Deputetja demokrate shton më tej se shumica parlamentare, sipas saj, po vepron si mbi çdo pushtet, duke akuzuar se Kuvendi është kthyer në një “seksion të Partisë Socialiste”.
Reagimi i Zhupës vjen në kuadër të përplasjeve politike mes mazhorancës dhe opozitës lidhur me vendimet e gjykatave dhe funksionimin e institucioneve.
