Deputeti i Partisë Demokratike, Belind Këlliçi, deklaroi të enjten se gjatë dhënies së dëshmisë në Gjykatën e Posaçme Kundër Korrupsionit dhe Krimit të Organizuar (GJKKO) lidhur me dosjen e njohur si “5 D”, është ndjerë i intimiduar.
“Në këtë proces në gjykatë isha i thirrur si dëshmitar dhe si kallëzues për dosjen famoze të 5 drejtorëve. Jam pyetur nga gjykata dhe prokuroria e posaçme për rrethanat e ngjarjes. Kam dhënë përgjigjet e mia shteruese për aq sa kam informacion. Jam pyetur në mënyrë intimiduese për deklaratat. Është kaluar në interpretime politike…”, u shpreh Këlliçi.
Ai shtoi se disa pyetje nga avokatët nuk kishin lidhje me çështjen për të cilën ishte thirrur, duke përmendur shembull zgjedhjet për Bashkinë e Tiranës.
Deklarata e tij vjen pas një seance ku Këlliçi u paraqit si dëshmitar dhe kallëzues në një nga hetimet më të ndjekura nga SPAK, që lidhen me akuzat për keqpërdorim dhe korrupsion ndaj disa ish-drejtorëve.
