Evi Kokalari, ka reaguar në rrjetet sociale pas riformatimit të Kryesisë së PD-së, duke pretenduar se ndryshimet e fundit janë pjesë e një plani për të përgatitur ardhjen e Argita Malltezit në krye të partisë.
Në postimin e saj, Kokalari shprehet se përbërja e re e Kryesisë është ndërtuar në funksion të këtij skenari dhe se, sipas saj, janë larguar figurat që mund të konsideroheshin burim konfliktesh në të ardhmen.
Ajo pretendon se organi drejtues i PD-së dominohet nga persona të afërt me Shkëlzen Berishën, si dhe nga figura që, sipas saj, kanë pranuar mënyrën aktuale të funksionimit të partisë pa kundërshtime.
Në reagimin e saj, Kokalari përmend edhe deputeten Albana Vokshi dhe sekretarin e përgjithshëm të PD-së, Flamur Noka, duke pretenduar se ky i fundit do të ketë një rol të rëndësishëm në procesin e ardhjes së Argita Malltezit në drejtimin e Partisë Demokratike.
Sipas Kokalarit, Argita Malltezi nuk ka pasur kontribute politike të drejtpërdrejta në PD, ndërsa pretendon se ajo ka ndikuar më herët edhe në përzgjedhjen e Lulzim Bashës në krye të partisë.
Aktivistja ka komentuar edhe zgjedhjen e Belind Këlliçit si nënkryetar të Partisë Demokratike, duke pretenduar se fakti që ai nuk është pjesë e Kryesisë e bën më të lehtë largimin e tij në të ardhmen, nëse do të jetë e nevojshme politikisht.
Po ashtu, Kokalari ka reaguar edhe për largimin e disa figurave nga strukturat drejtuese të PD-së, mes tyre edhe Ibsen Elezit dhe të tjerë që kanë qenë kritikë të lidershipit aktual, duke pretenduar se përzgjedhjet brenda partisë ndikohen nga preferencat personale të Argita Malltezit.
Në postimin e saj, ajo ndalet edhe te zhvillimet politike në Shtetet e Bashkuara të Amerikës, duke deklaruar se aktualisht vëmendja është e përqendruar te çështje të tjera ndërkombëtare, por sipas saj, në një moment të ardhshëm sytë do të drejtohen edhe nga Shqipëria.
Në fund të reagimit, Kokalari shprehet se mirëpret një përfshirje më të madhe të Argita Malltezit në drejtimin e Partisë Demokratike, duke deklaruar se ajo dhe Shkëlzen Berisha do të mbajnë përgjegjësi politike për veprimet dhe vendimmarrjet që, sipas saj, lidhen me periudhën e qeverisjes së ish-kryeministrit Sali Berisha.
