Skender Hita ka emëruar Edvin Ndreun në krye të Drejtorisë Vendore të Policisë Vlorë, duke i besuar drejtimin e një prej qarqeve më të rëndësishme të vendit në aspektin e rendit dhe sigurisë publike.
Ndreu zëvendëson Elidon Çelën, i cili u largua nga detyra pas polemikave të forta që pasuan incidentin e ndodhur gjatë protestës kundër projektit turistik në Zvërnec.
Emri i Edvin Ndreut nuk është i panjohur në radhët e Policisë së Shtetit. Ai ka mbajtur më herët poste drejtuese në strukturat e policisë, përfshirë detyrën e shefit të Komisariatit nr. 6 në Tiranë, ndërsa së fundmi drejtonte strukturat e Kufirit dhe Migracionit për qarkun e Tiranës.
Emërimi i tij në Vlorë vjen në një moment të ndjeshëm për policinë lokale, pas reagimeve të forta publike dhe politike që shkaktoi ngjarja e Zvërnecit.
Shkarkimi i Elidon Çelës pas incidentit në Zvërnec
Largimi i Elidon Çelës nga drejtimi i Policisë së Vlorës lidhet me mënyrën se si u raportua zyrtarisht incidenti i ndodhur gjatë protestës së aktivistëve dhe qytetarëve kundër projektit turistik në Zvërnec.
Pamjet filmike të publikuara në media dhe rrjete sociale treguan një protestues që merrej zvarrë nga punonjës të sigurisë private, ndërsa ngjarja ndodhte në prani të efektivëve të Policisë së Shtetit.
Në reagimin e saj të parë, Policia e Vlorës deklaroi se protestuesi ishte futur me forcë në zonën e rrethuar të kantierit. Megjithatë, ky version u rrëzua më pas nga vetë Drejtoria e Përgjithshme e Policisë së Shtetit.
Në një reagim zyrtar, Drejtori i Përgjithshëm i Policisë së Shtetit, Skënder Hita, kërkoi ndjesë publike për komunikimin e bërë nga Policia e Vlorës dhe sqaroi se qytetari nuk ishte futur me forcë në territorin e rrethuar, siç ishte pretenduar fillimisht.
Pas këtij përgënjeshtrimi zyrtar, Hita vendosi pezullimin e menjëhershëm të Elidon Çelës nga detyra, duke argumentuar se raportimi i pasaktë i ngjarjes kishte cenuar besimin e publikut ndaj Policisë së Shtetit.
Ngjarja mori edhe përmasa politike, pasi kryeministri Edi Rama e cilësoi si “akt të neveritshëm” mënyrën se si protestuesi u trajtua nga rojet private, duke deklaruar se personat përgjegjës duhej të ishin arrestuar në vend dhe jo të justifikohej dhuna ndaj qytetarit.
Sfida e parë për drejtuesin e ri
Me marrjen e detyrës, Edvin Ndreu përballet me sfidën e rikthimit të besimit të publikut ndaj Policisë së Vlorës, në një periudhë kur qarku po ndodhet në qendër të vëmendjes për shkak të debateve mbi projektet turistike, konfliktet mbi pronësinë dhe protestat qytetare.
Vlora konsiderohet një nga qarqet më të rëndësishme për Policinë e Shtetit, jo vetëm për shkak të sezonit turistik dhe fluksit të vizitorëve, por edhe për menaxhimin e çështjeve të rendit publik në zonat bregdetare ku po zhvillohen investime strategjike.
