Komisioni për Çështjet Europiane u mblodh sot në orën 11:00 në sallën “Pjetër Arbnori” të Kuvendit për të shqyrtuar projektpozicionin negociues për Grupkapitullin e V-të “Burimet, bujqësia dhe kohezioni” në kuadër të negociatave të Shqipërisë me Bashkimin Europian.

Mbledhjen e drejton zëvendës kryetarja Etilda Gjonaj, ndërsa opozita vendosi ta bojkotojë, duke argumentuar se procesi po zhvillohet në kundërshtim me Kushtetutën.

Kryetarja e Komisionit, Jorida Tabaku, tha se mbledhja nuk mund të zhvillohet jashtë sesionit parlamentar:

“I sqarova qeverisë që mbledhja e komisionit jashtë sesioni është antikushtetuese! Për një javë fillon sesioni i ri parlamentar dhe opozita e ka prioritet procesin e integrimit dhe do të bëjë çdo gjë në dorë të saj, ashtu si ka bërë në çdo rast për këtë proces!
Ofrova disa zgjidhje praktike se si mund ta kalonim këtë ngërç, por qeveria vazhdoi në mënyrë të njëanshme!
Asnjë nga deputetët që sot kanë thirrur mbledhjen nuk janë të rizgjedhur dhe nuk e kanë legjitimitetin të thërrasin mbledhje jashtë sesioni,” u shpreh Tabaku.

Debati reflekton tensionet mes qeverisë dhe opozitës mbi mënyrën e menaxhimit të procesit të integrimit europian dhe respektimin e rregullave kushtetuese për funksionimin e komisioneve parlamentare.