Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim në Gjykatën e Posaçme të Shkallës së Parë procedimin penal nr. 55/2019, në ngarkim të ish-presidentit Ilir Meta, ish-kryetares së LSI Monika Kryemadhi dhe katër të pandehurve të tjerë.
Sipas SPAK, Ilir Meta akuzohet për “korrupsion pasiv i funksionarëve të lartë” në tre raste, dy prej tyre të kryera në bashkëpunim, për “pastrim të produkteve të veprës penale”, si edhe për mosdeklarim apo fshehje pasurie, të parashikuara nga nenet 260, 25, 287/2 dhe 257/a/2 të Kodit Penal.
Monika Kryemadhi akuzohet për dy raste korrupsioni pasiv në bashkëpunim, pastrim parash dhe fshehje apo mosdeklarim pasurie.
Në të njëjtin proces janë përfshirë edhe:
Pirro Xhixho, i akuzuar për korrupsion pasiv në bashkëpunim;
Ema Çoku dhe Fatime Kryemadhi, të akuzuara për pastrim parash në bashkëpunim.
SPAK sqaron se hetimi ka nisur në vitin 2019 dhe është zgjeruar me kallëzime të ndryshme, ndërsa në vitin 2024 të gjitha procedimet e veçuara u bashkuan në një dosje të vetme.
Sipas prokurorisë, janë dokumentuar episode të shumta ku të pandehurit, në bashkëpunim, kanë përdorur ndikimin dhe pushtetin politik për të favorizuar biznese të caktuara në këmbim të përfitimeve financiare, kanë pastruar produkte të veprës penale dhe kanë fshehur pasuritë apo shpenzimet reale në deklaratat zyrtare.
SPAK thekson gjithashtu se hetimet janë zhvilluar në bashkëpunim me autoritetet e Shteteve të Bashkuara të Amerikës, Austrisë, Italisë, San Marinos dhe Qipros.
