Presidenti i Shteteve të Bashkuara, Donald Trump, njoftoi këtë javë vendosjen e një kufizimi njëvjeçar për normat e interesit të kartave të kreditit, duke i ulur ato në maksimumin 10%, një masë që ka nxitur reagime të forta dhe të ndara në politikë, sektorin bankar dhe opinionin publik.
Në një postim në rrjetet sociale të premten në mbrëmje, Trump deklaroi se kufizimi do të hyjë në fuqi më 20 janar, por pa dhënë detaje konkrete mbi mekanizmat ligjorë apo institucionale për zbatimin dhe mbikëqyrjen e kësaj mase nga kompanitë e kartave të kreditit.
“Ne nuk do të lejojmë më që publiku amerikan të mashtrohet nga kompanitë e kartave të kreditit që ngarkojnë interesa prej 20 deri në 30 për qind, ose edhe më shumë,” shkroi Trump në platformën Truth Social, duke ia atribuar situatën administratës së mëparshme të Joe Biden.
Presidenti theksoi gjithashtu se data 20 janar përkon “rastësisht” me përvjetorin e parë të asaj që e cilësoi si “administrata historike dhe shumë e suksesshme Trump”.
Njoftimi vjen në një moment kur borxhi i kartave të kreditit në SHBA ka arritur nivele rekord. Sipas të dhënave zyrtare, në tremujorin e tretë të vitit 2024, borxhi i kartave të kreditit arriti në 1.17 trilion dollarë, nga 770 miliardë dollarë në tremujorin e parë të vitit 2021, duke shtuar presionin mbi familjet amerikane përballë normave të larta të interesit.
Gjatë fushatës për një mandat të dytë, Trump kishte premtuar vendosjen e një kufiri për interesat e kartave të kreditit, por deri më tani nuk kishte ndërmarrë hapa konkretë. Për këtë arsye, senatorët Bernie Sanders dhe Josh Hawley prezantuan në shkurt 2025 një projektligj dypartiak për të kufizuar normat e interesit në 10% për një periudhë pesëvjeçare, i cili megjithatë u bllokua në Kongres për shkak të kundërshtimit të fortë nga grupet bankare.
Vetëm një ditë para njoftimit të Trump, senatori Sanders e kishte kritikuar presidentin për mospërmbushjen e premtimit të fushatës. “Trump premtoi të kufizonte interesat në 10%, por u dha bankave liri të plotë për të ngarkuar deri në 30%,” shkroi Sanders në rrjetet sociale.
Pas njoftimit, reagime kritike erdhën edhe nga sektori financiar. Investitori miliarder dhe mbështetësi i Trump, Bill Ackman, e cilësoi fillimisht masën si “një gabim”, duke paralajmëruar se kompanitë e kartave të kreditit mund të anulonin kartat e miliona konsumatorëve. Edhe pse më pas ai sqaroi se qëllimi i uljes së interesave është i drejtë, Ackman theksoi se një kufi 10% mund të kufizojë ndjeshëm aksesin në kredi, veçanërisht për huamarrësit me risk të lartë.
Skepticizëm shprehu edhe senatorja Elizabeth Warren, e cila vuri në dyshim nëse Trump ka autoritetin ligjor për të zbatuar një masë të tillë pa miratimin e Kongresit. “T’u kërkosh kompanive të kartave të kreditit të sillen mirë nuk funksionon,” u shpreh ajo, duke akuzuar Trump se ka dobësuar institucionet mbikëqyrëse financiare.
Nga ana tjetër, senatori republikan Josh Hawley e përshëndeti njoftimin e presidentit, duke e cilësuar atë si një hap të rëndësishëm në mbrojtje të konsumatorëve amerikanë.
Ndërsa debati vazhdon, mbetet e paqartë nëse kufizimi i interesit do të zbatohet realisht dhe në çfarë forme, duke qenë se mungojnë ende detajet ligjore dhe institucionale për realizimin e kësaj nisme.
