Shqipëria renditet mbi mesataren e Bashkimit Europian për përdorimin e energjisë së rinovueshme, sipas të dhënave më të fundit të Eurostat. Në vend, 43.1% e energjisë totale të konsumuar vjen nga burime të rinovueshme, një nivel dukshëm më i lartë se mesatarja e BE-së, e cila qëndron në 25.2%.
Në krye të renditjes europiane dominojnë vendet nordike. Suedia kryeson me 66% të energjisë totale nga burime të rinovueshme, e ndjekur nga Finlanda me 47%, Letonia me 45%, Danimarka me 44% dhe Estonia me 43%.
Në anën tjetër të listës renditen disa shtete të Europës Perëndimore, ku përdorimi i energjisë së pastër mbetet i ulët. Irlanda zë vendin e fundit me vetëm 13%, e ndjekur nga Malta me 14%, Belgjika me 14.5%, Luksemburgu me 15% dhe Holanda me 16%.
Panorama ndryshon kur bëhet fjalë vetëm për energjinë elektrike. Në Bashkimin Europian, 47.5% e energjisë elektrike prodhohet nga burime të rinovueshme. Disa vende, si Austria dhe Suedia, i afrohen ose e kalojnë nivelin 90%, duke u mbështetur kryesisht në hidroenergji dhe energjinë e erës.
Bashkimi Europian ka vendosur një objektiv ambicioz për të ardhmen: deri në vitin 2030, 42.5% e energjisë totale duhet të vijë nga burime të rinovueshme. Arritja e këtij synimi kërkon investime të mëdha, veçanërisht në sektorët e transportit dhe të ngrohjes, ku varësia nga karburantet fosile mbetet e lartë.
Të dhënat tregojnë se, ndonëse Europa po avancon drejt tranzicionit energjetik, ritmet e përparimit ndryshojnë ndjeshëm nga një vend në tjetrin. Shqipëria përfiton nga burimet e saj natyrore, veçanërisht hidroenergjinë, por sfida kryesore mbetet diversifikimi i burimeve dhe ulja e varësisë nga energjia fosile në sektorët kyç të ekonomisë.
