Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Sali Berisha, kreu i PD, ka bashkëbiseduar online me qytetarët, ku u ndal te rritja e çmimeve të karburanteve dhe masat që opozita synon të ndërmarrë.
Gjatë komunikimit, një qytetare e pyeti Berishën nëse Partia Demokratike ka përgatitur ndonjë draft konkret për uljen e çmimit të naftës. Në përgjigje, ai bëri të ditur se tashmë ekziston një propozim i qartë ligjor.
Sipas tij, drafti parashikon përgjysmimin e taksës së qarkullimit dhe rishikimin e akcizës, me qëllim uljen e menjëhershme të çmimit të karburanteve për qytetarët.
“Kemi përgatitur draftin me të cilin ne kërkojmë menjëherë përgjysmimin e taksës së qarkullimit dhe lëvizjen e akcizës,” u shpreh Berisha.
Ai shtoi gjithashtu se opozita do të kërkojë vendosjen e një sistemi fiskal të ngjashëm me atë të Kosovë dhe Maqedoni e Veriut, ku sipas tij çmimet e karburanteve janë më të ulëta krahasuar me Shqipërinë.
Berisha argumentoi se në këto vende, edhe kur çmimet rriten në tregun ndërkombëtar, niveli i taksave bën që karburanti të mbetet më i përballueshëm për qytetarët.
Deklaratat e tij vijnë në një kohë kur çmimet e naftës vijojnë të jenë një nga shqetësimet kryesore për konsumatorët dhe bizneset në vend.
