Gjykata e Posaçme Kundër Korrupsionit dhe Krimit të Organizuar ka rrëzuar kërkesën e kreut të Partise e Lirisë, Ilir Meta, për zëvendësimin e masës së sigurisë “arrest në burg”.

Meta kishte kërkuar një masë më të lehtë, duke ofruar një garanci pasurore prej 50 mijë eurosh për lirimin nga qelia, por kërkesa e tij nuk është pranuar nga gjykata.

Kjo lëvizje vjen vetëm një ditë pasi GJKKO vendosi kalimin për gjykim në themel të dosjes penale ndaj Metës dhe disa personave të tjerë, mes tyre Monika Kryemadhi, Fatime Kryemadhi, Pirro Xhixho dhe Ema Çoku.

Kreu i Partisë së Lirisë po hetohet për akuza që lidhen me korrupsionin, pastrimin e parave dhe fshehjen e pasurisë, ndërsa çështja tashmë ka hyrë në fazën e shqyrtimit në themel nga gjykata.