Kryeministri britanik Keir Starmer ka njoftuar se ka dhënë dorëheqjen nga posti i kryeministrit të Mbretërisë së Bashkuar dhe nga drejtimi i Partisë Laburiste.
Para shpalljes së dorëheqjes, Starmer deklaroi se kishte trashëguar një Parti Laburiste që, sipas tij, ishte “politikisht, financiarisht dhe moralisht e falimentuar”. Ai tha se i ishte përsëritur vazhdimisht se partia ishte “e mbaruar”, por theksoi se u ka treguar këtyre njerëzve që e kanë pasur gabim.
Kryeministri në detyrë shtoi se gjatë udhëheqjes së tij e ka ndryshuar partinë duke “çrrënjosur helmin e antisemitizmit” dhe duke rikthyer besimin në ekonomi, mbrojtje dhe siguri kombëtare.
Starmer bëri të ditur se ka informuar edhe Mbretin për vendimin e tij dhe se ka kërkuar nga Komiteti Ekzekutiv Kombëtar i Partisë Laburiste të përcaktojë një afat për zgjedhjen e liderit të ri, me nominimet që do të hapen më 9 korrik dhe procesin që pritet të përfundojë para pushimit veror të parlamentit.
Sipas tij, kjo do të thotë se një udhëheqës i ri do të jetë në detyrë përpara rikthimit të parlamentit në shtator, ndërsa deri atëherë ai do të vazhdojë të qëndrojë në detyrë si kryeministër.
Starmer u zotua gjithashtu për një tranzicion të rregullt të pushtetit dhe tha se do ta mbështesë plotësisht pasardhësin e tij. Ai shtoi se udhëheqësi i ri do të trashëgojë një Britani “më të fortë dhe më të drejtë” se dy vite më parë.
Në fund, ai falënderoi bashkëpunëtorët e tij, stafin e Downing Street dhe shërbimin civil për punën dhe mbështetjen gjatë gjashtë viteve të fundit.
