Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Drejtoria e Antiterrorit, në bashkëpunim me strukturat e Hetimit të Krimit Kibernetik dhe prokuroritë e juridiksionit të përgjithshëm, ka intensifikuar hetimet ndaj publikimeve në rrjetet sociale të lidhura me protestat kundër qeverisë, të zhvilluara në Tiranë dhe në qarqe të tjera që prej 13 tetorit 2026.
Sipas njoftimit zyrtar të Policisë së Shtetit, si rezultat i veprimeve hetimore është ndaluar një person, ndërsa 17 të tjerë janë proceduar penalisht. Po ashtu, materialet për disa llogari në rrjetet sociale janë referuar në Prokurori për identifikimin e personave që dyshohet se kanë bërë thirrje për veprime të dhunshme.
Policia thotë se hetimet lidhen me mesazhe, komente dhe publikime me përmbajtje të dyshuar të paligjshme, kërcënuese ose nxitëse të dhunës. Megjithatë, pretendimet e autoriteteve për secilin rast duhet të vlerësohen në kuadër të procedurave përkatëse dhe nuk përbëjnë vetvetiu prova përfundimtare të fajësisë.
Kërcënim për bomba në tri godina, ndalohet 33-vjeçari
Rasti i parë i bërë publik nga Policia lidhet me një 33-vjeçar me inicialet E. Xh., banues në Tiranë, i cili është ndaluar për veprën penale “Përhapja e informacioneve të rreme që ngjallin panik”.
Sipas hetimeve paraprake, ai dyshohet se i ka dërguar një mesazh kërcënues në Facebook një subjekti privat, duke paralajmëruar vendosjen e bombave në tri godina të ndryshme të këtij subjekti.
Dyshohet se bënte thirrje për dhunë dhe mblidhte para online
Në listën e personave për të cilët janë referuar materiale në Prokurori është edhe një 34-vjeçar me inicialet A. K., i dyshuar për veprën penale “Thirrjet publike për veprime të dhunshme”.
Sipas Policisë, ai ka publikuar në Instagram thirrje për kryerjen e veprimeve të dhunshme gjatë protestave të javëve të fundit.
Autoritetet ngrenë gjithashtu dyshime se 34-vjeçari ka hapur një llogari në platformën GoFundMe për të mbledhur fonde, duke u paraqitur para qytetarëve sikur i rrezikohej jeta.
Gjatë kontrollit, sipas njoftimit, atij i është gjetur një dokument identifikimi si gazetar, të cilin Policia pretendon se e përdorte për t’iu shmangur kufizimeve dhe shoqërimit nga efektivët. Dokumenti është sekuestruar si provë materiale.
Video me oferta parash për dhunë ndaj politikanëve
Një tjetër rast i evidentuar lidhet me një 51-vjeçar me inicialet E. N., banues në Shëngjin, ndaj të cilit janë referuar materiale për veprat penale “Thirrje publike për veprime të dhunshme” dhe “Thirrja për urrejtje nacionale”.
Sipas Policisë, ai ka publikuar video në rrjetet sociale përmes të cilave dyshohet se ka ofruar shuma parash për kryerjen e veprimeve të dhunshme ndaj përfaqësuesve të zgjedhur të Kuvendit dhe anëtarëve të Këshillit të Ministrave.
Rasti është referuar në Prokurori për veprime të mëtejshme hetimore.
Publikonte të dhëna dhe fotografi të policëve
Në hetimet e Antiterrorit dhe Krimit Kibernetik është përfshirë edhe një 37-vjeçar me inicialet G. P., i dyshuar për veprat penale “Ndërhyrje të padrejta në jetën private” dhe “Përndjekja”.
Sipas njoftimit, ai ka publikuar në mënyrë të përsëritur të dhëna personale, fotografi dhe video të punonjësve të Policisë së Shtetit, të shoqëruara me komente fyese, denigruese dhe akuzuese.
Policia pretendon se këto publikime ekspozonin identitetin e efektivëve të angazhuar për garantimin e rendit dhe sigurisë gjatë protestave, duke krijuar rrezik për ta dhe familjarët e tyre.
Në llogarinë që administronte 37-vjeçari, sipas autoriteteve, janë evidentuar edhe postime me paralajmërime kërcënuese ndaj institucioneve shtetërore, si dhe thirrje për identifikimin e personave të tjerë.
Thirrje për dhunë dhe shkrime antikushtetuese në rrjetet sociale
Në kuadër të të njëjtit operacion, Policia ka referuar në Prokurori edhe disa raste të tjera.
Një 56-vjeçar me inicialet A. G., banues në Tiranë, dyshohet se ka publikuar fotografi dhe shkrime që përmbanin thirrje për veprime të dhunshme gjatë protestave.
Ndërsa një 50-vjeçar me inicialet A. A., gjithashtu banues në Tiranë, është referuar për veprat penale “Shpërndarja e shkrimeve antikushtetuese” dhe “Thirrjet publike për veprime të dhunshme”, pasi, sipas Policisë, ka publikuar një shkrim me përmbajtje të tillë në Facebook.
Një tjetër rast lidhet me një 20-vjeçar me inicialet O. M., i cili dyshohet se gjatë një proteste ka vendosur në fasadën kryesore të Universitetit Politeknik një banderolë që përmbante simbol nazist. Për të janë referuar materiale për organizimin dhe pjesëmarrjen në grumbullime e manifestime të paligjshme dhe shpërndarjen e shkrimeve antikushtetuese.
Përveç këtyre rasteve, Policia njofton se 11 persona të tjerë, të moshave nga 18 deri në 46 vjeç, janë proceduar për dyshime lidhur me thirrje publike për veprime të dhunshme në platforma të ndryshme komunikimi online.
Nën hetim edhe llogari anonime
Përveç personave të identifikuar, materialet janë referuar në Prokurori edhe për shtatë llogari në platforma të ndryshme komunikimi online, ku dyshohet se janë publikuar mesazhe, shkrime dhe komente që nxisnin veprime të dhunshme gjatë protestave.
Po ashtu, një llogari në Instagram po hetohet për thirrje të dyshuara për dhunë dhe përhapje të informacioneve të rreme që mund të ngjallin panik.
Policia bën të ditur se po vijon puna për identifikimin e administratorëve të këtyre llogarive dhe të personave të tjerë që mund të kenë lidhje me publikimet.
