Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ish-ministrja e Mbrojtjes, Olta Xhaçka, është paraqitur këtë të mërkurë në Prokurorinë e Posaçme, në një kohë kur bashkëshorti i saj, ish-deputeti socialist Artan Gaçi, është nën hetim për dyshime për pastrim parash dhe korrupsion.
Xhaçka ka hyrë në ambientet e SPAK pak minuta pasi Gaçi u largua nga prokuroria, ku ishte paraqitur për të dhënë deklarime në kuadër të hetimit ndaj tij. Ashtu si në daljet e mëparshme, Gaçi nuk ka dhënë koment për gazetarët lidhur me arsyen e thirrjes.
Hetimi ndaj ish-deputetit lidhet me transaksione financiare të kompanive të tij dhe transferta të dyshuara parash në disa shtete. Hetimi është regjistruar në vitin 2025 dhe përfshin dyshime për pastrim të produkteve të veprës penale dhe korrupsion.
Raportohet se hetuesit po verifikojnë edhe rolin e mundshëm të Xhaçkës, për shkak të funksionit që ajo ka mbajtur si ministre e Mbrojtjes gjatë periudhës që lidhet me dyshimet. Megjithatë, deri në këtë fazë nuk ka një njoftim zyrtar që të konfirmojë se ish-ministrja është marrë e pandehur në këtë dosje.
Sa herë është paraqitur Olta Xhaçka në SPAK dhe për çfarë?
Paraqitja e kësaj të mërkure nuk është e para për ish-ministren. Xhaçka është paraqitur të paktën tri herë më parë në Prokurorinë e Posaçme, për çështje të ndryshme që lidhen kryesisht me pronat e ushtrisë dhe Portin e Limionit.
13 mars 2023 – Pyetet për pronat e ushtrisë
Në mars të vitit 2023, kur mbante detyrën e ministres për Evropën dhe Punët e Jashtme, Xhaçka u paraqit në SPAK për t’u marrë në pyetje lidhur me hetimet për tjetërsimin e pronave të ushtrisë.
Çështja lidhej me kallëzime të bëra nga ish-zëvendëskomandanti i Forcës Detare, Artur Meçollari, për procedurat e privatizimit dhe dhënies në përdorim të pronave ushtarake gjatë kohës kur Xhaçka drejtonte Ministrinë e Mbrojtjes.
7 prill 2023 – Rikthehet në SPAK për të njëjtën çështje
Më pak se një muaj pas paraqitjes së parë, Xhaçka u thirr sërish në Prokurorinë e Posaçme. Në atë kohë, mediat raportuan se kjo ishte hera e dytë brenda një periudhe të shkurtër që ajo paraqitej për çështjen e pronave të ushtrisë dhe hetimet e lidhura me to. Xhaçka i kishte cilësuar akuzat e ngritura ndaj saj si shpifje dhe kishte deklaruar se nuk kishte shkelur ligjin.
23 dhjetor 2025 – Hetimet për Portin e Limionit
Në dhjetor të vitit 2025, ish-ministrja u paraqit përsëri në SPAK. Sipas raportimeve mediatike, ajo ishte thirrur për hetimet që lidhen me Portin e Limionit në Sarandë.
Çështja lidhet me vendimin e Këshillit të Ministrave të 1 korrikut 2020 për dhënien me qira për 20 vjet të bazës detare të Limionit, me një tarifë simbolike prej një euroje, një bashkimi prej dy shoqërish.
Hetimet nisën pas kallëzimit të Artur Meçollarit për procedurat e ndjekura për dhënien e pronës ushtarake në përdorim të privatit. Në kuadër të kësaj çështjeje, baza detare është raportuar e sekuestruar në pritje të përfundimit të hetimeve.
14 tetor 2026 – Paraqitja e radhës, pas hetimit ndaj Artan Gaçit
Këtë të mërkurë, Xhaçka është paraqitur sërish në SPAK, pak minuta pasi bashkëshorti i saj u largua nga ambientet e prokurorisë.
Artan Gaçi u paraqit më 8 tetor në Prokurorinë e Posaçme, ku, sipas avokatit të tij, dha deklarime si person nën hetim. Mbrojtësi ligjor Gurali Brahimllari deklaroi se kishin kërkuar të njiheshin me aktet hetimore, pa bërë publike detaje të tjera mbi dosjen.
Sipas raportimeve, hetimi i ri lidhet me transaksione financiare dhe dyshime për pastrim parash e korrupsion. Ende nuk është bërë e ditur zyrtarisht nëse paraqitja e sotme e Xhaçkës lidhet drejtpërdrejt me këtë dosje apo me një çështje tjetër.
Dokumenti/ GJKKO urdhëron SPAK të marrë të pandehur Olta Xhaçkën dhe Artan Gaçin
Olta Xhaçka del nga SPAK pas dy orësh/ Ul kokën para mediave
