Prokuroria e Posaçme kundër Korrupsionit dhe Krimit të Organizuar (SPAK) po vijon hetimet në kuadër të një procedimi penal që lidhet me dyshime për pastrim parash dhe veprimtari të tjera të paligjshme, ku në fokus është edhe krijimi i një medie audiovizive në Shqipëri.

Sipas burimeve hetimore, nga analizimi i komunikimeve të siguruara përmes platformës Sky ECC dhe verifikimeve në Qendra Kombëtare e Biznesit, është evidentuar media me emrin tregtar “Abeg TV”, e regjistruar në pronësi të Besnik Myftarit.

Hetuesit dyshojnë se Myftari, i cili më herët ka mbajtur poste drejtuese në media kombëtare, ndodhet aktualisht në Francë. Sipas të dhënave paraprake, SPAK po verifikon burimin e financimeve të medias, si dhe lidhjet e mundshme të saj me persona të dyshuar si pjesë e një grupi kriminal.

Burimet bëjnë me dije se në këtë media janë punësuar edhe gazetarë të njohur të tregut mediatik shqiptar, ndërsa hetimet synojnë të përcaktojnë nëse ata kanë pasur dijeni për burimin e financimeve apo aktivitetet që po verifikohen nga autoritetet, shkruan MCN.

Paralelisht, SPAK po shqyrton edhe procedurat e ndjekura nga Autoriteti i Mediave Audiovizive për licencimin e televizionit dhe radios, pas dyshimeve se procesi mund të jetë ndikuar nga veprime korruptive ose shkelje të procedurave ligjore.

Sipas informacioneve hetimore, po verifikohen gjithashtu komunikime që lidhen me procesin e marrjes së licencës, ndërsa dyshohet se persona të lidhur me grupin kriminal kanë pasur interes të drejtpërdrejtë në ngritjen dhe funksionimin e medias.

Hetimet vijojnë për të zbardhur rolet e personave të përfshirë, burimin e fondeve dhe ligjshmërinë e procedurave që kanë shoqëruar krijimin dhe operimin e subjektit mediatik. Në këtë fazë, nuk ka ende akuza të ngritura apo vendime gjyqësore përfundimtare ndaj personave të përmendur.