Përmes një reagimi në rrjetet sociale, Kokalari bëri të ditur se kallëzimi penal është ngritur ndaj Sali Berishës, Shkëlzen Berishës, Argita Malltezit, Albana Vokshi dhe personave të tjerë, për atë që ajo e cilëson si kontrollim të partisë që prej Kuvendit të 30 Prillit 2022.

Sipas saj, në kallëzim janë paraqitur në detaje mënyrat se si Partia Demokratike është përdorur, sipas pretendimeve të saj, si “mburojë kundër SPAK-ut”.

Kokalari deklaroi gjithashtu se është vënë në dispozicion të plotë të SPAK-ut për këtë çështje dhe për çdo hetim tjetër ku mund të kërkohet dëshmia apo bashkëpunimi i saj.

Në reagimin e publikuar, ajo renditi edhe hapat që thotë se ka ndërmarrë deri më tani kallëzim penal në SPAK, padi civile me kërkesë për pezullimin e Kuvendit të 23 Majit, e cila sipas saj është pranuar nga Gjykata, denoncim pranë zyrës së Sekretarit amerikan të Shtetit, Marco Rubio, dhe zyrtarëve të tjerë amerikanë si dhe informim të zyrtarëve të lartë të European People’s Party.

Në fund të deklaratës së saj, Kokalari u shpreh se me ndihmën e SPAK-ut, Gjykatës dhe mbështetjes ndërkombëtare nga DASH dhe EPP, sipas saj, do të “izolohet kanceri që ka pushtuar opozitën dhe politikën shqiptare”.