Në reagimin e tij, Malaj thekson se “llogaridhënia dhe transparenca nuk mund të mohohen për asnjë shqiptar”, duke i cilësuar ato si parime bazë dhe kushte të rëndësishme në rrugën e vendit drejt Bashkimit Europian.

Ai ka renditur disa çështje që, sipas tij, kërkojnë përgjigje nga institucionet përgjegjëse.

Sipas Malajt, ministri i Infrastrukturës nuk ka dhënë sqarime lidhur me humbjen e 8.5 milionë eurove të garancisë së ofertës për Porto Romanon.

Gjithashtu, ai akuzon ministrin e Financave për mungesë reagimi lidhur me të ardhurat nga bastet sportive, për të cilat pretendon se prej rreth gjashtë vitesh vijojnë të funksionojnë në informalitet të plotë. Duke iu referuar ekspertëve publikë, Malaj deklaron se humbjet e shkaktuara nga kjo situatë vlerësohen në rreth 1 miliard euro.

Një tjetër kritikë e tij ka qenë ndaj Korporata Shqiptare e Investimeve (AIC), për të cilën thotë se ka refuzuar të japë informacion mbi kontratat dhe asetet publike që administron.

Sipas Malajt, AIC i ka kërkuar që informacionin ta kërkojë pranë Agjencia Shqiptare e Zhvillimit të Investimeve (AIDA), gjë që ai e konsideron “anashkalim flagrant të ligjit”, duke argumentuar se dy institucionet janë persona juridikë të ndryshëm dhe se AIC ka detyrimin ligjor të përgjigjet vetë për kontratat e lidhura në emër të shtetit shqiptar.

Në fund të reagimit të tij, Malaj thekson se “fshehja pas institucioneve të tjera është joetike dhe e paligjshme”, ndërsa shton se “llogaridhënia nuk është opsionale”.