Presidenti i Republikës, Bajram Begaj, ka firmosur një sërë dekretesh për lirimin nga detyra dhe emërimin e disa ambasadorëve të Republikës së Shqipërisë në vende të ndryshme të botës, duke sjellë lëvizje në trupën diplomatike.

Sipas njoftimit zyrtar, kreu i shtetit ka dekretuar lirimin nga detyra të pesë ambasadorëve.

Mes tyre është Z. Riza Poda, i cili mbante detyrën e ambasadorit të jashtëzakonshëm dhe fuqiplotë të Shqipërisë në Republikën Popullore të Kinës, rezident, si dhe ishte i akredituar jo rezident në disa vende të tjera aziatike, përfshirë Bangladeshin, Korenë e Veriut, Vietnamin, Mongolinë dhe Tajlandën.

Po ashtu, është dekretuar lirimi nga detyra i Z. Bardhyl Canaj, ambasador në Republikën e Serbisë, si dhe i Z. Sami Shiba, ambasador në Republikën Arabe të Egjiptit, i cili mbulonte njëkohësisht edhe disa vende të tjera në rajonin e Lindjes së Mesme dhe Afrikës së Veriut.

Në listën e të liruarve nga detyra përfshihet edhe Znj. Vasilika Hysi, ambasadore në misionin e përhershëm të Shqipërisë pranë Zyrës së Kombeve të Bashkuara dhe organizatave të tjera ndërkombëtare në Gjenevë.

Gjithashtu, Presidenti ka dekretuar lirimin nga detyra të Znj. Albana Dautllari, e cila shërbente si ambasadore në Mbretërinë e Belgjikës dhe njëkohësisht jo rezidente në Luksemburg.

Paralelisht me këto lirime, kreu i shtetit ka firmosur edhe emërime të reja në shërbimin diplomatik.

Në këtë kuadër, Z. Gazmend Barbullushi është emëruar ambasador i jashtëzakonshëm dhe fuqiplotë i Shqipërisë në Mbretërinë e Belgjikës, rezident, si dhe ambasador jo rezident në Dukatin e Madh të Luksemburgut.

Ndërkohë, Znj. Albana Dautllari është emëruar në një detyrë të re, si ambasadore e Shqipërisë pranë Misionit të Bashkimit Evropian, një pozicion kyç në përfaqësimin diplomatik të vendit në Bruksel.

Këto lëvizje konsiderohen pjesë e riorganizimit të përfaqësimit diplomatik të Shqipërisë në arenën ndërkombëtare.