Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Procesi i votimit do të nisë në orën 09:00 dhe do të zgjasë deri në orën 18:00, ndërsa në garë janë tetë kandidatë që synojnë drejtimin e institucionit për një mandat 4-vjeçar.
Pas më shumë se dy dekadash drejtimi nga avokati Fatmir Brakaj, i cili ka qenë në krye të Dhomës së Avokatisë Tiranë që prej vitit 2001, tashmë pritet të zgjidhet pasuesi i tij.
Të drejtën e votës e kanë rreth 1910 avokatë të regjistruar në degën e Tiranës.
Mes emrave më të komentuar në këtë garë përmenden Lulzim Alushaj, Sajmir Visha, Klodian Skënderaj dhe Edmond Petraj.
Lulzim Alushaj kandidon gjithashtu edhe për një post në Këshillin e Përgjithshëm të Dhomës së Avokatisë së Shqipërisë dhe numëron 21 vite eksperiencë në profesionin e avokatit. Ai është diplomuar në Bolonja dhe ka përfunduar studimet doktorale në fushën “Qeverisja e Bashkimit Europian, Politikat Sociale dhe Fiskale”, ndërsa është i licencuar për të ushtruar profesionin edhe në Itali.
Në garë për drejtimin e Dhomës së Avokatisë Tiranë janë edhe katër gra: Gentjana Qendro, Malbina Lika, Mirela Biba dhe Sonila Velo.
Zgjedhjet pritet të përcaktojnë drejtimin e ri të një prej institucioneve më të rëndësishme të sistemit të drejtësisë dhe përfaqësimit të avokatëve në vend.
